«Chiliz» sport va muxlislar ishtirokini oshirish uchun yaratilgan blokcheyn loyihasi bo‘lib, 2026-yilda Amerika Qo‘shma Shtatlarida bo‘lib o‘tadigan FIFA Jahon chempionati oldidan «Fan Token» — muxlis tokenlari — ni rivojlantirish bo‘yicha uch bosqichli reja taqdim etdi.
Loyiha AQSh bozoriga katta qaytishni rejalashtirmoqda. Endilikda milliy terma jamoalarga bog‘langan yangi muxlis tokenlari chiqariladi va blokcheyn tarmog‘i yanada kengayadi. Yangi e’lon qilingan 2030-yilga mo‘ljallangan manifestga ko‘ra, 2026-yil «Chiliz» uchun tajriba bosqichidan to‘liq amaliyotga o‘tish yili bo‘lishi kutilmoqda.
Qoida va tartiblarning aniqligi AQSH bozoriga qaytishga yo‘l ochmoqda
Kompaniya o‘zining ilk AQSh fan tokeni hamkorliklarini 2026-yilning birinchi choragida e’lon qilishni kutmoqda. Bu bir necha yillik tartibga solishdagi noaniqlik sababli paydo bo‘lgan tanaffusdan so‘ng amalga oshirilishi rejalashtirilmoqda.
Shuningdek, «Chiliz» 2026-yil yozida milliy terma jamoalarga aloqador muxlis tokenlari — yangi tokenlar — ni chiqarishni mo‘ljallagan. Klub tokenlaridan farqli o‘laroq, milliy terma muxlis tokenlari asosan yirik musobaqa va xalqaro bellashuvlarga yo‘naltiriladi.
Jahon chempionati yaqinlashayotgan bir vaqtda, «Chiliz» an’anaviy klublar muxlislari doirasidan tashqariga chiqib, ommaviy, voqeaga asoslangan auditoriyani jalb qilishni ko‘zlamoqda.
Omnichain kengayishi DeFi, ya’ni markazlashmagan moliyaviy xizmatlardan foydalanishni ochadi
2026-yilda yana bir muhim o‘zgarish amalga oshiriladi: «Chiliz» omnicheyn, ya’ni ko‘p tarmoqli modelga o‘tishni boshlaydi. Birinchi chorakdan boshlab muxlis tokenlari boshqa blokcheyn tarmoqlari bilan bog‘lash uchun maxsus infratuzilma orqali uzatiladi, ya’ni ular boshqa blokcheynlarda ham ishlashi mumkin bo‘ladi.
Oddiy qilib aytganda, bu mexanizm muxlis tokenlariga «Chiliz» ekotizimi doirasidan chiqib boshqa blokcheyn tarmoqlari bilan ham aloqada bo‘lish imkonini yaratadi.
Bu o‘zgarish bilan likvidlik, ya’ni tokenlarning tez va oson almashinuvi yaxshilanadi, shuningdek, turli blokcheynlar o‘rtasida savdo va arbitraj – farqdan foyda olish imkoniyati – ochiladi. Bundan tashqari, muxlis tokenlar o‘z tarmog‘idan tashqarida markazlashmagan moliyaviy ilovalarda ham qo‘llanilishi mumkin bo‘ladi.
Yangi tokenomika va mahsulot yangilanishlari 2026 yilgacha bosqichma-bosqich joriy etiladi
2026-yilning ikkinchi choragida «Chiliz» o‘zining asosiy CHZ tokeni uchun yangi qiymat yig‘ish mexanizmini ishga tushirishni mo‘ljallagan.
Yangi model bo‘yicha ekotizimda hosil bo‘ladigan barcha muxlis tokeni daromadlarining 10 foizi doimiy CHZ tokeni qayta xarid qilish uchun ishlatiladi. Kompaniya bu orqali CHZ tokeniga bo‘lgan talabni to‘g‘ridan-to‘g‘ri muxlislar faolligi bilan bog‘lashni maqsad qilgan.
2026-yil o‘rtasiga kelib mahsulotlarni yangilash ham rejalashtirilgan.
Muxlis tokenlari uchun xizmat ko‘rsatuvchi «Socios.com» platformasi ham DeFi – markazlashmagan moliya – hamyoniga mos yangi versiyada taqdim etiladi.
Yil oxirigacha «Chiliz» natijaga asoslangan token mexanizmlarini tatbiq qilmoqchi. O‘yin natijalari bevosita muxlis tokenlari miqdoriga ta’sir qiladi: g‘alaba qozonilganda tokenlar yo‘q qilinadi, mag‘lubiyatda esa yangi tokenlar chiqariladi.
2026-yildan keyin esa «Chiliz» sport olamida haqiqiy aktivlarni tokenlashtirish — raqamli ko‘rinishga olib o‘tish — rejasiga o‘tadi. 2027-yildan boshlab kompaniya sportdagi daromad manbalari, intellektual mulk va an’anaviy ravishda likvid bo‘lmagan, ya’ni osongina sotib bo‘lmaydigan boshqa aktivlarni ham tokenlashtirishni rejalashtirmoqda.
Ushbu yo‘l xaritasi oxirgi paytlarda «Chiliz» ekotizimida amalga oshirilgan yangiliklarni o‘z ichiga oladi. Bu yangiliklar orasida daromadga bog‘langan qayta xarid majburiyatlari va qisqa muddatli narx o‘zgarishlaridan infratuzilmani rivojlantirishga bo‘lgan e’tibor ortib bormoqda.
Jahon chempionati yaqinlashar ekan, «Chiliz» muxlis tokenlari shunchaki ishtirok vositasi emas, balki butun dunyo miqyosida alohida sport aktiv sinfiga aylanishi mumkinligiga ishonmoqda.
