«Crypto.com» kriptovalyuta birjasi va moliyaviy xizmatlar platformasi Amerika Qo‘shma Shtatlari Moliya Vazirligi huzuridagi Valyuta nazoratchisi idorasi («Office of the Comptroller of the Currency» — davlat nazorat organi) tomonidan milliy ishonchli bank tuzish uchun shartli rozilik oldi.
Shu orqali «Crypto.com» platformasi tobora ko‘payayotgan va 2023-yilda ham ayni shu turdagi ruxsat olgan raqamli aktiv kompaniyalari qatoriga qo‘shildi.
Crypto.com milliy ishonch banki litsenziyasini olish bo‘yicha OCC’ning shartli roziligini oldi
«BeInCrypto» axborot nashri xabariga ko‘ra, «Crypto.com» kompaniyasi 2025-yil oktyabr oyida milliy ishonchli bank maqomini olish uchun rasmiy ariza bergan. Ushbu ariza bo‘yicha «Valyuta nazoratchisi idorasi» 2026-yil fevral oyida shartli rozilik berdi. Bu kompaniya uchun muhim voqea bo‘ldi.
Shuni ta’kidlash kerakki, shartli rozilik — bu jarayonning boshlang‘ich bosqichi hisoblanadi. Kompaniya to‘liq ruxsat olishidan oldin, davlat me’yoriy va faoliyatga doir talablarini to‘liq bajara olishi kerak.
«Crypto.com bugun e’lon qilishicha, moliya nazorati bo‘yicha davlat organi – Valyuta nazoratchisi idorasi (OCC)dan Foris Dax National Trust Bank, ya’ni Crypto.com National Trust Bank nomi ostida milliy ishonchli bank tashkil etish uchun shartli rozilik oldi», – deyiladi bayonotda.
«Crypto.com» kompaniyasi shuningdek, ushbu rozilik «Crypto.com Custody Trust Company» ishonchli tashkilotining kundalik faoliyatiga ta’sir ko‘rsatmasligini alohida ta’kidladi. Ushbu tashkilot Nyu-Xempshir shtati Bank boshqarmasi tomonidan tartibga solinadigan, depozit qabul qilmaydigan ishonchli kompaniya sifatida ishlashni davom ettiradi.
«Ushbu shartli ruxsat – bu bizning qonunlarga bo‘lgan hurmatimiz hamda foydalanuvchilarga ishonchli va xavfsiz xizmat yetkazilib berilishiga sodiqligimizning navbatdagi tasdig‘idir. Bu voqea bizni etakchi moliyaviy tashkilotlar uchun yuqori talablar va federal nazorat ostida yagona, ishonchli hamkorga aylanish sari bir qadam yaqinlashtiradi», – dedi Kris Marszalek, «Crypto.com» kompaniyasi hammuassisi va bosh direktori.
Shuningdek, «Ripple» kriptovalyuta kompaniyasi, «Circle» (moliyaviy platforma), «Paxos» va «Fidelity Investments» (sarmoya kompaniyasi) ham 2025-yil dekabr oyida milliy ishonchli bank maqomini olish uchun shartli rozilikka ega bo‘ldi. «BitGo» kompaniyasi esa o‘tgan yil oxirida «Valyuta nazoratchisi idorasi»dan to‘liq rozilik olib, o‘zining shtatdagi ishonchli kompaniyasini milliy ishonchli bankka aylantira oldi.
Bundan tashqari, Donald Tramp tomonidan qo‘llab-quvvatlanadigan «World Liberty Financial» (DeFi – markazlashmagan moliyaviy loyihasi) loyihasining tarkibidagi sho‘ba kompaniya ham 2026-yil yanvar oyida «World Liberty» Trust Company, National Association (WLTC) – milliy ishonchli bank tashkil etish uchun Valyuta nazoratchisi idorasiga ariza topshirdi. Mazkur tashkilot faoliyati asosan barqaror kriptovalyutalar – steyblkoinlar bilan bog‘liq bo‘ladi.
Kriptovalyuta kompaniyalarining federal darajadagi bank tizimiga kirib borishi ular faoliyatining AQSH moliyaviy tartibga solinishi tizimiga yanada chuqurroq integratsiyalashayotganini ko‘rsatadi. Milliy ishonchli bank maqomiga ega bo‘lish qonuniy maqom beradi, aktivlarni saqlash imkoniyatlarini kuchaytiradi va tashkilotlarning ishonchliligini oshirishi mumkin. Bunday tashkilotlar «Valyuta nazoratchisi idorasi» federal nazorati ostida faoliyat olib boradi.
Biroq bunday tendensiya muayyan xavotirlarni ham yuzaga keltirdi. «American Bankers Association» (ABА – Amerikaning banklar uyushmasi) va «Independent Community Bankers of America» (ICBA – mustaqil jamoa banklari uyushmasi) ushbu shartli ruxsatnomalarga qarshi chiqmoqda. Ularning fikriga ko‘ra, kengayib borayotgan kripto-bank ruxsatnomalari AQSH bank tizimida aniq chegaralarning yo‘qolishiga va yangi muammolar paydo bo‘lishiga olib kelishi mumkin.
