Kriptovalyuta bozori 2025-yil dekabr oyining uchinchi haftasida taxminan 666,4 million dollarlik tokenlar to‘lqinini kutib oladi. Asosiy loyihalar qatorida «LayerZero» (ZRO), «Arbitrum» (ARB) va «Sei» (SEI) bor bo‘lib, ular keyingi yetti kun ichida yangi tokenlarni muomalaga chiqaradi.
Ushbu tokenlarning ochilishi qisqa muddat ichida narxda tebranishlarni oshirishi va butun bozordagi narx dinamikasiga ta’sir qilishi mumkin. Quyida har bir loyiha bo‘yicha e’tibor berish lozim bo‘lgan asosiy jihatlar keltirilgan.
1. LayerZero (ZRO)
- Ochilish sanasi: 20-dekabr
- Ochiladigan tokenlar soni: 25,71 million ZRO (umumiy ta’minotning 2,57 foizi)
- Joriy muomaladagi ta’minot: 202,6 million ZRO
- Umumiy ta’minot: 1 milliard ZRO
«LayerZero» – bu turli blokcheynlarni bir-biriga ulovchi o‘zaro ishlash protokoli hisoblanadi. Uning asosiy maqsadi – bir blokcheyndan ikkinchisiga oson va bevosita ma’lumot uzatishni ta’minlash. Bu orqali markazsizlashtirilgan ilovalar (dApps) bir nechta blokcheynda bir vaqtning o‘zida ishlashi, eski ko‘prik (bridging) usullariga ehtiyoj sezmasligi mumkin bo‘ladi.
Loyiha jamoasi 20-dekabr kuni 25,71 million tokenni muomalaga chiqaradi; ularning qiymati 38,31 million dollar atrofida bo‘ladi. Bu to‘plam chiqarilgan jami ta’minotning 6,79 foizini tashkil qiladi.
«LayerZero» yuzasidan 13,42 million altkoin strategik hamkorlarga ajratiladi. Asosiy loyihaga hissa qo‘shuvchilar esa 10,63 million ZRO oladi. Nihoyat, 1,67 million ZRO loyiha jamoasi tomonidan tokenlarni qayta sotib olish uchun ajratiladi.
2. Arbitrum (ARB)
- Ochilish sanasi: 16-dekabr
- Ochiladigan tokenlar soni: 92,65 million ARB (umumiy ta’minotning 0,93 foizi)
- Joriy muomaladagi ta’minot: 5,6 milliard ARB
- Umumiy ta’minot: 10 milliard ARB
«Arbitrum» – bu «Efirium» (ETH) tarmog‘i uchun ishlab chiqilgan, uni kengaytiruvchi Layer-2 yechim hisoblanadi. U tranzaksiyalar tezligini oshiradi va xarajatlarni kamaytiradi, shu bilan birga «Efirium» tarmog‘ining xavfsizligini saqlab qoladi. Bunga «optimistik rollaplar» orqali erishiladi: tranzaksiyalar avval blokcheyndan tashqarida, ya’ni asosiy tarmoqdan tashqarida qayta ishlanadi va keyin haqiqiyligi uchun «Efirium» asosiy tarmog‘iga yuboriladi.
16-dekabrda «Arbitrum» 92,65 million yangi tokenni bozorga chiqaradi. Ularning qiymati 19,3 million dollar bo‘ladi va chiqarilgan umumiy ta’minotning 1,9 foizini tashkil etadi.
«Arbitrum» tomonidan chiqariladigan 56,13 million ARB jamoaga, kelgusidagi jamoa a’zolari va maslahatchilarga ajratiladi. Qolgan 36,52 million token esa investorlar o‘rtasida taqsimlanadi.
3. Sei (SEI)
- Ochilish sanasi: 15-dekabr
- Ochiladigan tokenlar soni: 55,56 million SEI (umumiy ta’minotning 0,55 foizi)
- Joriy muomaladagi ta’minot: 6,49 milliard SEI
- Umumiy ta’minot: 10 milliard SEI
«Sei» – bu «Kosmos SDK» platformasi asosida qurilgan asosiy blokcheyn tarmog‘i (Layer-1) hisoblanadi. «Sei» tarmog‘i markazsizlashtirilgan moliya (DeFi) va boshqa markazsizlashtirilgan ilovalar uchun yuqori unumdorlikdagi infratuzilmani taqdim etadi.
«Sei» 15-dekabr kuni 55,56 million tokenni ochadi; ular 6,98 million dollar atrofida baholanmoqda. Ochiladigan tokenlar chiqarilgan ta’minotning 1,08 foizini tashkil etadi. Ushbu chiqariladigan tokenlarning barchasi loyiha jamoasiga ajratiladi.
Bundan tashqari, dekabr oyining uchinchi haftasida investorlar e’tibor qaratishi mumkin bo‘lgan boshqa muhim token ochilishlar ham bor. Ularga «Lista DAO» (LISTA), «ZKsync» (ZK), «ApeCoin» (APE) va boshqa loyihalar kiradi. Ushbu tokenlarning ham bozorga chiqarilishi umumiy bozordagi muomalaning oshishiga hissa qo‘shadi.
