Elon Musk asoschiligidagi «X» ijtimoiy tarmog‘i o‘zining yangi Dizayn bo‘limi rahbari etib Benji Teylorni tayinladi. Benji Teylor – tajribali mutaxassis, u ilgari «Aave Labs» (kripto sohasidagi kompaniya) hamda «Coinbase»ning «Base» tarmog‘ida ishlagan.
Benji Teylor «Los Feliz Engineering» kompaniyasiga asos solgan. 2023-yilda «Aave Labs» – bu markazlashmagan moliyaviy (DeFi) kredit platformasi bo‘lgan «Aave» protokolini ishlab chiqqan tashkilot – uning kompaniyasini sotib olgan.
Shundan so‘ng Benji Teylor «Aave Labs»da dastlab mahsulot va dizayn bo‘yicha katta vitse-prezident, keyinchalik esa bosh mahsulot direktori sifatida faoliyat yuritgan. U bu lavozimda 2025-yil oktyabrgacha ishlagan. So‘nggi olti oy davomida esa u «Coinbase» (kripto birjasi)ning «Base» tarmog‘ida dizayn bo‘limi rahbari bo‘lgan.
Benji Teylor o‘zining bayonotida quyidagilarni ta’kidladi: «Men «X» ijtimoiy tarmog‘iga dizayn bo‘limiga rahbarlik qilish uchun qo‘shilayotganimdan faxrlanaman. Bu dunyodagi eng muhim platforma deb hisoblayman va kelajakni shakllantirishda bundan ko‘ra hayajonli joy bo‘lishi mumkin emas», – deb yozdi Teylor.
So‘nggi yangiliklardan xabardor bo‘lish uchun bizni «X» ijtimoiy tarmog‘ida kuzatib boring
«X» ijtimoiy tarmog‘i mahsulotlar bo‘yicha rahbari Nikita Bierning (Nikita Bier) aytishicha, Benji Teylorni ishga taklif qilish uchun taxminan olti oy davomida ko‘ndirish ishlari olib borilgan. Teylor endi jamoadan joy olgani sababli, Nikita Bier katta maqsadlar haqida gapirdi va «sanoatdagi eng kuchli dizayn jamoasini» tuzish niyatini bildirdi.
Nikita Bier quyidagilarni aytdi: «Men Benjini olti yil avval uning ilovasiga sarmoya kiritganimda tanishganman. Bu eng chiroyli ishlab chiqilgan mahsulotlardan biri edi. Men darhol u dunyodagi eng yaxshi dizaynerlardan biriga aylanish yo‘lida ekanini tushunganman», — dedi u.
Shu orada, Benji Teylorning jamoaga kelib qo‘shilishi tufayli ba’zi bozor tahlilchilari bu o‘zgarish «X» ijtimoiy tarmog‘i kriptovalyuta integratsiyasiga tayyorlanayotganidan darak deb hisoblamoqda.
Shuni ta’kidlash joizki, «X Money» mahsuloti mart oyidan boshlab cheklangan beta testdan o‘tkazilmoqda. Aktyor Uilyam Shatner (William Shatner), test ishtirokchilaridan biri sifatida, interfeysdan skrinshotlar bilan bo‘lishgan.
Keyinchalik Elon Musk «X Money» aprel oyida dastlabki ommaviy foydalanishga chiqishni boshlashi haqida aytib o‘tdi. Bunda raqamli aktivlar imkoniyatlari ishga tushirilishidayoq mavjud bo‘ladimi yoki keyinroq qo‘shiladimi – hozircha aniq emas.
