Kriptovalyuta bozorida yirik sarmoyadorlar — «kitlar» — 2026-yil yanvar oyi oxirida Efirium (ETH) ni turli yo’nalishlarda harakatlantirmoqda. «Blokcheyn»dagi ma’lumotlarga ko’ra, ayrim yirik egalari kapitalni qayta taqsimlashmoqda, boshqalari esa Efirium narxi pasayganda uni ko’proq sotib olishmoqda. Bu holat bozorda tarqatish va uzoq muddatli jamg’arish o’rtasida tobora kuchayib borayotgan kurashni ko’rsatmoqda.
Ushbu farq bozor bosimi yana-da kuchaygani bir paytda yuz bermoqda. Hozirgi vaqtda bozorda hajmi jihatidan ikkinchi o’rinda turuvchi kriptovalyuta bir hafta ichida 10 foizdan ortiq qiymatini yo’qotdi.
Yanvarda bozordagi bosim kuchaygan bir paytda yirik Efirium egalari nimalar qilmoqda?
«BeInCrypto Markets» nashri ma’lumotlariga ko’ra, Efirium 2026-yil boshidagi barcha o’sishini yo’qotgan. Bozordagi hajmi bo’yicha ikkinchi kriptovalyuta yil boshidan beri deyarli 5 foizga pasaygan va 3 000 AQSH dollaridan past narxda qiynalishda davom etmoqda.
Mazkur tahlil yozilayotgan vaqtda, Efirium narxi $2 863,66 ni tashkil etib, so’nggi 24 soatda 2,69 foizga pasaygan edi.
Shunday sharoitda «kitlar» faoliyati tobora farqlanmoqda. To‘planish yo’nalishida, «Lookonchain» tahlil platformasi maʼlum qilishicha, OTC (birja tashqarisidagi) «kit» 0xFB7 manzili 20 000 ta Efirium — jami $56,13 million qiymatida — sotib olgan.
So’nggi besh kun ichida xuddi shu «kit» jami 70 013 ta Efirium yig’gan, buning qiymati taxminan $203,6 million. Bu jamg‘arish tendensiyasi yangilik emas.
Bundan oldin, «BeInCrypto» nashri xabar berganidek, Efirium «kitlari» bir kunda 350 000 donadan ortiq Efirium to‘plagan. Shuningdek, «CryptoQuant» tahliliy platformasi ma’lumotlariga ko‘ra, Efirium birjalaridagi zahiralar qisqarmoqda.
Bu esa, sotuv bosimining kamayganidan dalolat beradi va yirik egalari Efiriumni uzoq muddatli saqlash uchun birjalardan olib chiqib ketayotganini ko‘rsatadi. Shu vaqtda yirik sarmoyadorlar orasida kapital aylanishi ham yuz bermoqda.
«Donald Tramp» tomonidan ko‘llab-quvvatlangan DeFi (markazlashmagan moliyaviy xizmatlar) loyihasi — «World Liberty Financial» (loyiha) Bitkoindan Efiriumga kapitalini o‘tkazdi. Ular 93,77 WBTC (Bitkoin tokeni, qiymati $8,08 million) ni 2 868 Efiriumga almashtirdi. Yana bir «kit» manzili — 0xeA00 — 120 ta Bitkoinni ($10,68 million) sotib, o‘rniga 3 623 ta Efiriumga o’tdi.
Biroq, har bir «kit» harakati ham bozor uchun ijobiy emas. Dastlabki Efirium «kitlari»dan biri bo‘lgan 0xb5Ab manzil, 9 yillik faoliyatsizlikdan so‘ng, 50 000 Efirium — $145,25 million qiymatida — «Gemini» (kriptovalyuta birjasi) platformasiga kiritdi.
«Ushbu manzil 9 yil avval, Efirium narxi atigi $90 bo‘lganida, «Bitfinex» (kriptovalyuta birjasi) platformasidan 135 000 Efirium ($12,17 million) olgan edi. Hozirgi narx o‘shandan buyon 32 barobarga oshgan. Bugun 50 000 Efirium chiqarilgandan so‘ng-ham, bu manzil hanuz 85 000 Efirium ($244 million) saqlamoqda», – deya qayd etdi tahlilchi EmberCN «X ijtimoiy tarmog‘i» orqali.
Birjalarga yirik mablag‘lar o‘tkazilishi odatda potentsial sotuv bosimini oshirishi mumkin. Chunki bu uzoq muddatli saqlaovchilar foyda olish yoki portfelini boshqatdan tuzish, kapitalni boshqa yo‘nalishga o’tkazishga tayyorlanayotganidan dalolat beradi.
«Lookonchain» shuningdek, 0x3c9E manzili faoliyati haqida ma’lumot berdi. U «yuqoridan sotib olib, pastdan sotuvchi» «kit» sifatida yuritiladi. So‘nggi uch kun ichida bu hamyon 5 500 Efiriumni ($16,02 million) o‘rtacha $2 912 narxda sotib yuborgan. E’tiborga molik jihati — xuddi shu manzil besh kun avval, narx yuqoriroqda ($2 984 atrofida) bo‘lganida, 2 000 Efirium sotib olgan edi.
Efirium tarmog‘idagi faollik kuchli asoslarni ko‘rsatmoqda
Kitlar faoliyati turlicha bo‘lishi va Efirium narxidagi past o‘sish fonida, Efirium tarmog‘ining asosiy ko‘rsatkichlari esa ijobiy «signal» bermoqda. «CryptoOnchain» tahliliy platformasi ma’lumotida qayd etilishicha, Efirium faol manzillari bo‘yicha 7 kunlik soddalashtirilgan harakatlanuvchi o‘rtacha (indikator) ko‘rsatkich 718 000 ta bilan tarixiy maksimumga yetdi.
«Eng muhimi, grafikda Efirium narxi va tarmoq faolligi o‘rtasida aniq ayirma (Bullish Divergence — ijobiy tafovut) ko‘rinmoqda. Efirium (ETH) narxi turg‘un qolayotgan bo‘lsa-da, faol ishtirokchilar soni keskin oshdi», — deyiladi postda.
«CryptoOnchain» ta’kidlaganidek, bu o‘sish Efirium tarmog‘i asosiy faoliyati va amaliyoti, narxlar o‘zgarib turganiga qaramay, kuchli ekanini bildiradi. Tahlilga ko‘ra, o‘tgan yillar davomida xuddi shunday tafovutlar narx o‘sishini bildiruvchi «signal» bo‘lib xizmat qilgan.
«Bu o‘sish Layer-2 texnologiyalari (tarmoqning ustki darajasidagi muqobil yechimlar), DeFi (markazlashmagan moliyaviy xizmatlar) faolligi yoki oddiy jismoniy investorlarning qayta qiziqishi natijasi bo‘lishidan qat’i nazar, ma’lumotlar shuni ko‘rsatadiki, Efirium tarmog‘i jonli va faol. Bozor tez orada Efirium narxini ushbu muhim ko’rsatkichlardagi rekord o’sishga muvofiq yangilashi mumkin», — deb yozadi tahlilchi.
Texnik tahlil nuqtai nazaridan ham, mutaxassislar bir nechta signallarni ko‘rsatmoqda. Ular Efirium narxi ko‘tarilishi mumkinligini bildiradi.
Rekord darajadagi faol foydalanuvchilar soni, birjalardagi Efirium zahiralarining kamayishi va texnik ko‘rsatkichlar Efirium loyihasining barqarorligini kuchaytirmoqda. Biroq, umumiy kriptovalyuta bozoridagi tendensiyalar hamda kengroq iqtisodiy sharoitlar har qanday muhim harakatning vaqtiga ta’sir qilishi mumkin.
