2026-yilda kriptovalyuta sohasida yuqori natijalar kutilyapti. Bunga aholi o‘rtasida boylikni saqlash uchun muqobil imkoniyatlarga bo‘lgan talab oshishi va tartibga solish masalalari oydinlashayotgani sabab bo‘lmoqda.
«Grayscale» tadqiqot bo‘limi rahbari Zak Pandlning aytishicha, yangi tartibga solish qoidalarining qo‘llab-quvvatlovchi bo‘lishi kripto sektorini yanada kuchaytiradi. Shu bilan birga, oddiy pul – ya’ni, fiat valyutalar qadrsizlanib borayotgani ham talabni ko‘paytiradi. Bu ikki sharoit birga kelganda, Bitkoin narxi yangi tarixiy maksimumga erishishi mumkin.
Bozor tuzilmasi to‘g‘risidagi qonun loyihasi tokenlarni chiqarishni tezlashtirish uchun ishlab chiqildi
Kriptovalyutalar 2008-yildan buyon juda ko‘p rivojlandi. So‘nggi bir yilda ayniqsa sezilarli o‘zgarishlar bo‘ldi .
Masalan, kriptovalyuta birja orqali savdo fondlari (ETFlar) tasdiqlanishi va «GENIUS» qonuni qabul qilinishi natijasida raqamli aktivlar va an’anaviy moliya o‘rtasidagi masofa qisqardi. Biroq, hali ko‘p muhim ishlar oldinda turibdi.
Pandlning ta’kidlashicha, endigi muhim qadam – ikki partiyaviy bozor tuzilmasi qonunini qabul qilishdir. 2025-yilda davlat faoliyati to‘xtab qolishi va siyosiy kelishmovchiliklar tufayli kechikish yuz berdi, lekin u qonun loyihasi yil boshida Senatda qabul qilinishini kutmoqda.
«Ko‘rinishidan, biz yanvar oyida yoki yilning birinchi choragida muhim natijaga erishamiz», — dedi Zak Pandl «CNBC» telekanaliga bergan intervyusida. «Agar hammasi tez amalga oshmasa ham… ikki partiyaviy taraqqiyot eng asosiy jihat.»
Pandlning fikriga ko‘ra, ikki partiyaviy qonun qabul qilinsa, startaplardan tortib, «Fortune 500» (yirik kompaniyalar guruhi) kompaniyalarigacha bo‘lgan korxonalar tokenlarni o‘z kapitallarining tarkibiy qismi sifatida an’anaviy vositalar bilan bir qatorda chiqarishi odatiy holatga aylanadi.
Shuningdek, u umumiy makroiqtisodiy sharoitlar ham Bitkoin narxiga ijobiy ta’sir ko‘rsatishini qo‘shimcha qildi.
Bitkoin tarixiy maksimumiga yetishi uchun sharoitlar moslashmoqda
Bitkoin 2025-yilning ikkinchi yarmida zaif natija ko‘rsatgan bo‘lsa ham, Pandl soha yetakchi raqamli aktivining bu yil omadli bo‘lishini taxmin qilmoqda.
«Grayscale» tashkilotining 2026-yil bo‘yicha raqamli aktivlar hisobotiga ko‘ra, Bitkoin narxi yilning birinchi yarmida tarixiy maksimumga chiqishi kutilmoqda. Pandlning fikriga ko‘ra, bunga bir nechta omillar ta’sir qiladi.
«O‘ylashimcha, 2026-yilda AQSH dollari kuchsiz bo‘ladi, AQSH Federal Rezerv tizimi foiz stavkasi pasayadi, oltin va kumush kuchayadi… Shuningdek, Bitkoin, Efirium va yana ba’zi kripto aktivlar ham boylikni raqamli saqlash vositasi sifatida o‘sadi. Mana shu omillarning barchasi hozirgi makroiqtisodiy muhitda foydali bo‘ladi», — dedi u «CNBC» telekanaliga.
Shuningdek, bozor tuzilmasi haqidagi qonun qabul qilinsa, bu ham narxning ijobiy harakatlanishiga ko‘proq asos yaratadi.
Kriptovalyutani kengroq qamrab olish ham investorlarga yana ko‘proq turdagi aktivlarni qamrab oluvchi ETFlarning tezroq ishga tushishiga yordam beradi.
Kripto bozori tobora yetuklashar ekan, Pandl ba’zi eski yondashuv va hikoyalar ham o‘z ahamiyatini yo‘qotishini kutmoqda.
DATlar tugaydimi?
2025-yilda raqamli aktivlar g‘aznachiligi — «DATs» tashkilotlarida o‘sish bo‘ldi, biroq Pandl shu sur’at yangi yilga o‘tishini kutmaydi hamda buni «yo‘ldan chalg‘itadigan omil» deb atadi.
Ular odatda sekin-asta token yig‘ishadi, kam-kamda sotishadi va ko‘pincha narx o‘zining haqiqiy qiymatiga yaqin shakllanadi, deya ular faoliyati unchalik samarali emasligiga e’tibor qaratdi.
«Ular butunlay yo‘qolmaydi — chunki ayrim investorlar uchun kriptovalyutaga birjada sotiladigan aksiyalar orqali kirish qulay, — deb izoh berdi Pandl. — Ammo ular narxlar harakatiga asosiy turtki bo‘lishi ehtimoldan yiroq, na sotib olish, na sotish tarafidan.»
Buning o‘rniga, asosiy e’tibor — kengroq imkoniyat, qulay foydalanish va talabni amalda bozorga olib keladigan yangi mahsulotlarga qaratilishi ehtimol.
