Avstraliyaning 3,16 trillion AQSH dollari (4,5 trillion Avstraliya dollari) qiymatiga ega pensiya sohasi raqamli aktivlar masalasida o‘zgarish arafasida turibdi. Mamlakatdagi eng yirik jamg‘arma fondlaridan biri – «Hostplus» pensiya jamg‘armasi tashkiloti, endilikda o‘z a’zolari uchun sarmoya kiritish imkoniyati sifatida kriptovalyutani ko‘rib chiqmoqda.
Bu haqda «Bloomberg» axborot agentligi xabar berdi. Unga ko‘ra, hozirda taxminan 105 milliard dollar (150 milliard Avstraliya dollari)ni boshqarayotgan «Hostplus» fondi, o‘zining Choiceplus deb nomlangan investitsion tanlov shakli orqali Bitkoin va boshqa raqamli aktivlarni taklif qilish masalasini muhokama qilmoqda. Ushbu tanlov variantida foydalanuvchilar o‘z nafaqalariga oid jamg‘armalarni mustaqil boshqarishadi. Ayni paytda bu yo‘nalish fondning jami aktivlarining 1 foizini tashkil etadi.
«A’zolarimiz orasida, bizga murojaat qilib, “Nega men kriptovalyutaga kirish imkoniga ega emasman?” deb so‘rov yuborayotganlar borligi aniq», — deydi Bosh investitsiya direktori Sam Siciliya. Batafsil: Bloomberg.
2024 yil oxirida esa, «AMP Ltd.» boylik va pensiya jamg‘armalarini boshqaruvchi tashkiloti, Avstraliyadagi dastlabki yirik nafaqa fondlaridan biri sifatida kripto mahsulotlariga sarmoya kiritdi. Bu fond qariyb 17,2 million dollar (27 million Avstraliya dollari) miqdoridagi mablag‘ini Bitkoin fyucherslariga yo‘naltirdi.
Yangiliklardan birinchi bo‘lib xabardor bo‘lish uchun bizni «X» ijtimoiy tarmog‘ida kuzatib boring
Avstraliyada kriptovalyutadan foydalanish
Shu orada, «Hostplus» pensiya jamg‘armasi tashkilotining bu masalani ko‘rib chiqishi Avstraliyada kriptovalyutaga egalik qilish ko‘rsatkichi keskin oshgan bir vaqtda yuz bermoqda. Mamlakat bo‘ylab har yili o‘tkaziladigan «Independent Reserve» (kripto birjasi) tashkilotining 2026 yilgi Kriptovalyuta Indeksi tadqiqotiga ko‘ra, 2000 dan ortiq avstraliyaliklarning 33 foizi hozirda raqamli aktivlarga ega. Bu ko‘rsatkich — tarixiy maksimum hisoblanadi.
«O‘smir va yosh avstraliyaliklar moliyaviy haqiqatga duch kelishmoqda – an’anaviy boylik orttirish yo‘llari, xususan, uy-joy sotib olish, tobora qiyinlashmoqda. Shu sababdan, ko‘pchilik ilgari an’anaviy portfellar bilan solishtirganda yuqoriroq daromad keltirgan muqobil aktivlarni izlamoqda, tabiiyki, kriptovalyuta bu borada tanlovga aylandi», — deydi «Independent Reserve» (kripto birjasi) bosh direktori Adrian Prjelozniy.
Kriptovalyutalar to‘g‘risida xabardorlik 95 foizga yetdi. Bundan tashqari, 25–34 yosh oralig‘idagi avstraliyaliklarning yarmidan ko‘pi hozir kriptovalyutaga egalik qilmoqda. Ular eng faol yosh toifasiga aylanmoqda.
Hozirgi noaniqlik va o‘zgaruvchanliklarga qaramay, avstraliyaliklarning katta qismi raqamli aktivlarga uzoq muddatli nuqtai nazardan ijobiy qaraydi. Har besh kishidan ikki nafari, kelajakda kriptovalyutalar kundalik to‘lovlar uchun keng ommalashishiga ishonadi. Bugungi kunda aholining 67 foizi Bitkoinni haqiqiy moliyaviy vosita sifatida, sarmoya yoki qiymatni saqlovchi sifatida tan oladi.
Regulyatorlarning aniqlik kiritishi ham muhim omil sifatida qayd etildi. So‘rovda qatnashgan avstraliyaliklarning yarmidan ko‘pi kriptovalyuta birjalarini yanada aniqroq tartibga solish ularning ishonchini oshirishini bildirdi. Ulardan hozircha kriptovalyutaga sarmoya kiritmaganlar uchun esa kuchliroq iste’molchilar huquqlarini himoya qilish keng jamoani bozorga jalb qilishi mumkinligi aytildi.
