2026-yil yanvar oyining uchinchi haftasida kriptovalyuta bozorida umumiy qiymati 1.054 milliard dollardan ortiq boʻlgan tokenlar bozorga chiqadi. «Bitget» birjasi va ekotizimi uchun asosiy Bitget Token (BGB), shuningdek, «LayerZero» (blokcheynlararo aloqa protokoli, ZRO) va «River» (blokcheyn asosida ishlovchi platforma, RIVER) kabi yirik loyihalar yaqin etti kun ichida ilgari bloklangan tokenlarining muayyan qismini bozorga chiqaradi.
Bu tokenlarning qulfdan chiqishi qisqa muddatda narxlarning notinch bo‘lishiga olib kelishi va bozor harakatlariga ta’sir qilishi mumkin. Shu bois, quyida har bir loyiha bo‘yicha muhim jihatlar keltiriladi.
1. Bitget token (BGB)
- Qulfdan chiqarish sanasi: 26-yanvar
- Qulfdan chiqariladigan tokenlar soni: 140 million BGB
- Chiqariladigan jami ta’minot: 1.33 milliard BGB
- Umumiy ta’minot: 2 milliard BGB
BGB bu — «Bitget» kriptovalyuta birjasi va «Bitget Wallet» hamyoni uchun yagona ekotizim tokeni. BGB foydalanuvchilarga birjada savdo komissiyasi uchun chegirmalar beradi, platformadagi turli tadbirlarda ishtirok etish hamda qo‘shimcha imkoniyatlardan foydalanish imkonini yaratadi. Bu token, «Bitget» ekotizimi doirasida amaliy qulayliklarni taqdim etadi.
26-yanvar kuni loyiha jamoasi 140 million BGB, ya’ni 518 million dollarlik tokenlarni chiqaradi. Ushbu tokenlar chiqarilgan umumiy ta’minotning 10,5 foizini tashkil qiladi.
Qulfdan chiqarilgan BGBlarning bir qismi loyihaning asosiy jamoasiga – 80 million token rag‘batlantirish sifatida ajratiladi. Qolgan 60 million altkoin esa, «Bitget» brendini ommalashtirish va reklama maqsadlariga yo‘naltiriladi.
2. LayerZero (ZRO)
- Qulfdan chiqarish sanasi: 20-yanvar
- Qulfdan chiqariladigan tokenlar soni: 25,71 million ZRO
- Chiqariladigan jami ta’minot: 404,25 million ZRO
- Umumiy ta’minot: 1 milliard ZRO
«LayerZero» — bu blokcheynlararo aloqani ta’minlovchi muvofiqlik protokoli bo‘lib, har xil blokcheynlar o‘rtasida oson hamkorlikni yaratadi. Uning asosiy vazifasi turli blokcheynlar o‘rtasida to‘g‘ridan-to‘g‘ri va xavfsiz axborot almashinuvini ta’minlashdir. Shunday qilib, markazsizlashtirilgan ilovalar (dApp) bir nechta blokcheynlarda ishlay oladi va an’anaviy koʻprik modeliga tayanmaydi.
Loyiha jamoasi 20-yanvar kuni 25,71 million ZRO tokenini bozorga chiqaradi. Bu, chiqarilgan jami ta’minotning 6,36 foiziga to‘g‘ri keladi. Ushbu tokenlarning umumiy bahosi taxminan 43,96 million dollarni tashkil etadi.
«LayerZero» 13,42 million altkoinni asosiy hamkorlarga, 10,63 million ZRO tokenni asosiy moddiy hissa qo‘shuvchilarga beradi. Qolgan 1,67 million ZRO, loyiha tomonidan oldindan sotib olingan tokenlar hisoblanadi.
3. River (RIVER)
- Qulfdan chiqarish sanasi: 22-yanvar
- Qulfdan chiqariladigan tokenlar soni: 1,5 million RIVER
- Chiqariladigan jami ta’minot: 34,16 million RIVER
- Umumiy ta’minot: 100 million RIVER
«River» – bu blokcheynlar o‘rtasida barqaror token tizimini yaratishga qaratilgan protokol. Bu platforma foydalanuvchilarga bir blokcheynda aktivlarini garovga qo‘yib, boshqa tarmoqda yangi token chiqarish imkonini beradi. Natijada, foydalanuvchilar bir vaqtning o‘zida bir nechta blokcheynlarda daromad olish, moliyaviy vositalarni oshirish va tarmoq imkoniyatlaridan kengroq foydalanishlari mumkin.
Loyiha jamoasi 22-yanvar kuni bozorga 1,5 million RIVER tokenini chiqaradi. Ularning taxminiy qiymati 39,83 million dollarni tashkil etadi va bu chiqariladigan jami ta’minotning 4,32 foiziga to‘g‘ri keladi. Qulfdan chiqarilgan tokenlarning barchasi to‘g‘ridan-to‘g‘ri investorlar ixtiyoriga beriladi.
Bundan tashqari, dekabr oyining uchinchi haftasida investorlar e’tiborini tortadigan boshqa muhim qulfdan chiqarishlar ham bo‘ladi. Ular orasida «Plume» (blokcheyn loyihasi, PLUME), «Humanity» (ijtimoiy xizmat tashkiloti, H), «Undeads Games» (o‘yinga asoslangan platforma, UDS) va yana bir qator loyihalar bozorga yangi tokenlar chiqaradi. Bu jarayonlar bozor ombori umumiy hajmining ortishiga xizmat qiladi.
