Kriptovalyuta hamjamiyatining bir nechta a’zolari «X» ijtimoiy tarmog‘ining Mahsulot bo‘limi rahbari va «Solana» blokcheyn tarmog‘i maslahatchisi bo‘lgan Nikita Bierni ataylab kripto mavzusidagi kontentlarni «X» (oldingi nomi Twitter) ijtimoiy tarmog‘ida cheklayotganlikda ayblamoqdalar.
Bu ayblovlar, ko‘plab foydalanuvchilar o‘zlarining lenta — asosiy sahifalarida kriptovalyuta bilan bog‘liq postlar sonining sezilarli darajada kamayganini bildirgandan so‘ng paydo bo‘ldi.
X ijtimoiy tarmog‘ida kriptovalyuta ko‘rinishi: foydalanuvchilar nima sababdan xavotir bildirmoqda?
«X» ijtimoiy tarmog‘i uzoq vaqtdan buyon kriptovalyuta sohasida faol bo‘lganlar uchun asosiy manbalardan biri sifatida xizmat qilib kelmoqda. Bu yerda hamjamiyat soha yangiliklarini kuzatadi, bozor holatini tahlil qiladi, yangi imkoniyatlarni topadi hamda paydo bo‘layotgan loyihalar va meta-kontentlardan xabardor bo‘ladi. Ammo oxirgi paytda foydalanuvchilar o‘z lentasida kripto mavzusiga aloqasi bo‘lmagan postlar ko‘payib borayotganidan tashvish bildirayotganlar soni ortdi. Foydalanuvchilar o‘z lentalariga yangi o‘zgarish kiritilganidan xavotirda.
“Algoritm hozirgacha eng yomon ishlamoqda. Lentada faqat siyosiy mavzular, jahlga olib keluvchi va sun’iy faoliyatga undovchi postlar va atigi 10% kripto kontent chiqyapti. Hamjamiyatlar yo‘qolib bormoqda va bu ilova endi «Instagram» ijtimoiy tarmog‘i 2.0 ga aylanmoqda. Aslida esa bu platformaning asosiy yutug‘i, mavzular atrofida hamjamiyatlar shakllangan va ular o‘z doirasida faol bo‘lganida edi,” — deydi bozor tahlilchisi Etan o‘zining postida.
Foydalanuvchilardan birining shikoyatiga javoban Nikita Bier «X» ijtimoiy tarmog‘ining tavsiya tizimi qanday ishlashi haqida tushuntirish berishga harakat qildi. Biroq uning bu boradagi izohi keyinchalik oʻchirib tashlangan postda bayon qilingan edi. U mazkur soha — «Kripto Twitter» atrofida noto‘g‘ri tushunchalar paydo bo‘layotganini ta’kidladi.
Bier so‘zlariga ko‘ra, oktyabr oyidan beri «hisoblar kuniga yuzlab javoblar yozish kerak», degan «afsona» tarqalgan. Uning fikricha, bunday yondashuv foydadan ko‘ra zarar yetkazishi mumkin.
“Har safar siz post joylashtirsangiz, shu kunga mo‘ljallangan ko‘rish imkoniyatingizdan bir qismini sarflaysiz. (Axir biz barcha postlaringizni barcha kuzatuvchilarga ko‘rsata olmaymiz, chunki o‘rtacha foydalanuvchi kuniga atigi 20-30 postni o‘qiydi).”
Natijada, arzimagan va mazmunsiz javoblar — masalan, takror-takror “gm” (ya’ni, «xayrli tong») deb yozish — akkauntning yetib borish imkoniyatini tez tugatadi. Agar foydalanuvchi keyinroq mazmunli va muhim kontent joylashtirsa, uni faqat cheklangan auditoriya ko‘radi.
“Kripto Twitter o‘zi o‘zini yo‘qotmoqda, bunga algoritm emas sabab,” — deydi u.
Bundan tashqari, Bier ayrim postlarni iqtibos keltirish, ya’ni boshqalar joylashtirgan postlarga havola berish algoritmda lentaning tavsiya qilingan holatiga uzoq muddat ta’sir qilishi mumkinligini aniqlik kiritdi. Unga ko‘ra, bitta postga iqtibos kiritilsa, shunga o‘xshash kontent foydalanuvchining «Siz uchun» («For You») sahifasida 3-6 oy davomida ko‘rinib turishi mumkin.
Bu izohlar kriptovalyuta hamjamiyatida, xususan, «X» ijtimoiy tarmog‘ida juda katta norozilikka sabab bo‘ldi. Ayrim foydalanuvchilar Bierni platformada kripto kontentlarni ataylab cheklayotgani uchun tanqid qilishdi.
“Mahsulot rahbaridan aql bovar qilmas gap. Nikita ketishi kerak. U foydalanuvchilarning sonini oshirish va rivojlanishiga yordam berish o‘rniga, bizning yetib borish doiramizni ataylab chekladi va hamjamiyatimizni yo‘q qilishga harakat qildi. U odamlarni post joylashtirish va kontent yaratishdan tiyilishga undamoqda. Kripto Twitter o‘zi o‘zidan emas, aynan «X» ijtimoiy tarmog‘idan yo‘qolmoqda,” — deb izoh qoldirgan «Crypto Kaleo» ismidagi jamoa a’zosi (manba).
Boshqalar esa, Bierning «Solana» blokcheyn tarmog‘ida ham rasmiy maslahatchi sifatida ishlashi masalasini ko‘tardilar. Tanqidchilar, bu ikki lavozim birga bo‘lsa, manfaatlar to‘qnashuvi yuzaga kelishi mumkin, deb hisoblaydilar.
“«X» o‘zining kripto infratuzilmasini yaratmoqda, bunday vaziyatda manfaatlar to‘qnashuvi yuzaga kelmaydimi? Yaxshisi, barcha tarmoqlar birga ishlay oladigan bo‘lsa yaxshi, lekin bitta blokcheyn doim oldinga chiqib, uning maslahatchisi mahsulotga shakl bera boshlasa, bunga befarq bo‘lish qiyin,” — deb izoh qoldirgan boshqa bir hamjamiyat a’zosi (manba).
X platformasining kriptovalyutaga oid kontentiga munosabati borasida bahslar kuchaymoqda
Biroq, tanqidlar davom etayotgan bir paytda, ayrimlar Bierga nisbatan ayblovlarga qarshi chiqmoqda. Ijtimoiy tarmoq faoli Finans Friman fikricha, «X» ijtimoiy tarmog‘ining strategik maqsadlari ancha keng, ular faqat kripto mavzusi bilan cheklanib qolmaydi (manba).
“Kripto Twitter algoritimini aldash yo‘li — sohani buzayotgan firibgarlar va so‘ruvchilarga qarshi chiqish, shunda algoritm sizni mukofotlaydi. Mening bir videomda firibgarliklarni fosh qilib 72 000 marotaba ko‘rildi. Hammasi uchun Nikita Bierni ayblamaylik! «X» ijtimoiy tarmog‘ining asosiy maqsadlari kripto Twitterdan ancha kengroq. Qiziq, butun «X» ishlatilishining necha foizi kriptoga to‘g‘ri keladi?,” — deb yozgan Finans Friman o‘zining postida.
«CryptoQuant» kripto tahlil kompaniyasi asoschisi Ki Yong Ju esa, «X» ijtimoiy tarmog‘ida kripto kontentlar kamroq ko‘rinishiga botlar sonining ortishi sabab bo‘lishi mumkinligini aytdi. U platformadagi postida botlar bir kunda 7,7 milliondan koʻproq kripto-tegi qo‘yilgan post yozganini, bu esa 1 224% o‘sish ekanini ma’lum qildi.
«Sunʼiy intellekt rivojlanayotgan davrda, botlarning paydo bo‘lishi muqarrar. «Kaito» kompaniyasi ham ma’lum darajada aybdor, lekin «X» ijtimoiy tarmog‘ining botlarni odamlar bilan ajrata olmasligi asl muammo. «Tasdiqlangan foydalanuvchi» uchun tuzilgan pullik to‘siq ishlamadi va endi botlar ham pullik a’zolik orqali spam-tarqatishga kirishdi. Eng ajablanarlisi, «X» ijtimoiy tarmog‘i botlarni aniqlashni yaxshilash o‘rniga kriptovalyutalarni taqiq qilishni afzal ko‘rayotganidir», — dedi Ju .
Bundan tashqari, «Into The Cryptoverse» kompaniyasining asoschisi va bosh direktori Benjamin Koven, kripto mavzusidagi kontentga qiziqish barcha ijtimoiy platformalarda kamayib borayotganiga e’tibor qaratdi. Unga ko‘ra, bu muammo faqat «X» ijtimoiy tarmog‘iga bog‘liq emas. Uning fikricha,
«Bu faqat «X» ijtimoiy tarmog‘i yoki algoritm yangilanishi emas. Kriptovalyutalar haqidagi kontentga qiziqish barcha platformalarda qisqarib bormoqda».
Muammo atrofida davom etayotgan bahs, «X» ijtimoiy tarmog‘ida kriptovalyuta jamiyatining tobora so‘nib borayotgan mavqei ortidan xavotirlarni kuchaytirmoqda. Foydalanuvchilar esa bunga sabab — algoritmdagi o‘zgarishmi, platformaning nazorati yoki qiziqish susayganimi — degan savolga aniq javob izlamoqda.
