«Morgan Stanley» bank xoldingi, qiymati 9 trillion dollar bo‘lgan moliyaviy tashkilot, hozirgi vaqtda DeFi (Markazlashmagan moliyaviy xizmatlar) va haqiqiy aktivlarni tokenlashtirish (raqamli ko‘rinishga keltirish) sohalarida o‘zining kriptoinfratuzilma imkoniyatlarini jadallik bilan oshirmoqda.
Bu harakat AQSHda kriptovalyutalarga ijobiy munosabat shakllangan bir paytda, ko‘plab an’anaviy moliya tashkilotlari malakali xodimlarni ishga olishga intilayotgan umuman katta trendga mos keladi.
Morgan Stenli markazlashmagan ilovalar va tokenlashtirishga e’tiborini kuchaytirmoqda
LinkedIn ijtimoiy tarmog‘ida e’lon qilingan ish taklifiga ko‘ra, «Morgan Stanley» moliya tashkiloti blokcheyn arxitekturasini boshqaradigan yuqori malakali muhandisni izlayapti.
Qayd etish kerakki, ish tavsifida markazlashmagan moliyaviy xizmatlar (DeFi) va tokenlashtirish asosiy yo‘nalishlar sifatida alohida tilga olingan.
Bu ikki soha hozirda kriptoiqtisodiyotda eng tez o‘sayotgan yo‘nalishlarga aylandi. Tahlil platformasi «DeFiLlama» ma’lumotlariga ko‘ra, DeFi protokollari va haqiqiy aktivlarni tokenlashtirish loyihalari hozirda jami 100 milliard dollardan ortiq aktivlarni o‘zida jamlagan.
Ushbu o‘sishdan maksimal darajada foydalanish uchun, tanlangan nomzod «kengaytiriladigan, xavfsiz va qonunlarga mos tizimlarni yaratish»ga mas’ul bo‘ladi. Bu tizimlar an’anaviy bank xizmatlari bilan yangi raqamli aktivlar sanoati o‘rtasida ko‘prik bo‘lib xizmat qiladi.
Ishga qabul qilish uchun Efirium, Polygon, Hyperledger va Canton blokcheynlarida yetarli bilim hamda tajriba talab qilinadi.
Bu blokcheynlar birikmasi Efirium va Polygon blokcheynlaridan ommaviy tarmoq likvidliligi hamda Layer-2 texnologiyasi orqali samaradorlik olish uchun foydalanilishini ko‘rsatadi.
Boshqa tomondan, kompaniya Hyperledger va Canton blokcheynlarini yirik tashkilotlar uchun maxfiylikka ega va ruxsat asosida ishlaydigan tranzaksiyalarni amalga oshirish uchun tatbiq etishga tayyorlanmoqda.
Bu infratuzilmani rivojlantirish «Morgan Stanley» bank-moliya tashkilotining kriptoga oid kengaytirish rejalari bilan hamohangdir.
Kompaniya 2026 yilning birinchi yarmida o‘zining E*Trade savdo platformasida kriptovalyuta bilan savdo xizmatini ishga tushirishni rejalashtirmoqda. Ushbu yangi xizmat Bitkoin, Efirium va Solana tokenlarini sotib olish va sotish imkonini beradi.
Bu harakat boshqa an’anaviy moliyaviy tashkilotlarning (TradFi) tez kengayishini aks ettiradi. Masalan, «BlackRock» aktivlarni boshqarish tashkiloti va «Fidelity» moliyaviy kompaniyalari allaqachon yirik investitsion fondlarni tokenlashtirish yo‘nalishida ishlay boshlagan.
Shu bilan bir vaqtda, «JPMorgan Chase» bank-moliya tashkiloti kabi an’anaviy moliya gigantlarida ham blokcheyn sohasiga oid bo‘sh ish o‘rinlari soni oshib boryapti.
Bu esa bozorda tajriba uchun ishlab chiqilgan dasturiy loyihalardan doimiy va daromad keltiradigan raqamli aktiv mahsulotlarini ishlab chiqish bosqichiga o‘tayotganligini ko‘rsatadi.
