Chakana savdogarlar oltin va kumush birjada sotiladigan fondlarga (ETF – birjada savdo qilinadigan fondlar) faol sarmoya kiritmoqda. Bu xaridlar aynan yirik tashkilotlar aksincha, o‘z mablag‘larini olib chiqayotgan bir paytda sodir bo‘lmoqda.
«The Kobeissi Letter» tahliliy axborot platformasi ta’kidlashicha, 2025-yilning ikkinchi choragidan beri retail investorlar, ya’ni oddiy omma, oltin ETFlariga 70 milliard dollardan ortiq mablag‘ kiritgan. Oxirgi olti oy ichida bu investorlarning xarid faoliyati uch baravarga oshgan.
Yana bir muhim jihat: o‘tgan bir yil davomida chakana investorlar kumush ETFlariga ham 10 milliard dollardan ortiq sarmoya kiritgan.
«Chakana investorlar qimmatbaho metallarga to‘liq ishonmoqda», — deyiladi postida.
Biroq, chakana va institutsional, ya’ni yirik tashkilotlar pozitsiyalarida aniq tafovut bor. «The Kobeissi Letter» manbalariga ko‘ra, retail – ommaviy investorlar xarid qilayotgan bir paytda, yirik institutlar esa 1 milliard dollar oltin va 200 million dollar kumushni sotgan.
Bundan tashqari, yirik tashkilotlarning oltindan sarmoya chiqishi, yaʼni sotuvi yanada tezlashdi. Chunki yanvarda qimmatbaho metall narxi atigi 3 kun ichida 20 foizga tushib ketgan edi.
«Institutsiyalar oltinni 1 800 dollardan 4 900 dollargacha jamg‘ardi. Endi retail, ya’ni chakana sarmoyadorlar uch barobar faol xarid qilyapti va institutsiyalar ular orqali 1,2 milliard dollarni sotmoqda. Buni «distribusiya» — bozor taqsimoti deyiladi. Aqlli pul narx eng pastlaganida sotilmaydi. Ular talab kuchli bo‘lganda sarmoyani amalga oshiradi. Sizning talabingiz bo‘lsa, ular sotuvi ham kuchayadi», — deb yozgan «MSB Intel» tahliliy axborot tashkiloti postasida.
Hozirda esa, oltin va kumush narxlari Yaqin Sharqdagi ziddiyatlar kuchaygani bois tushmoqda. 28-fevral kuni Amerika Qo‘shma Shtatlari va Isroil davlati hamkorlikda Eron hududiga aviazarba uyushtirganidan beri oltin qariyb 9,44 foizga pasaygan. Kumush vaziyati yanada og‘irroq – tarixiy eng yuqori nuqtadan 22,59 foizga tushib ketgan.
Urush va geosiyosiy inqirozlar tarixan investorlarni odatda oltinga yo‘naltiradi. Lekin neft narxining har barrel uchun 100 dollardan oshib ketishi inflyatsiya xavfini kuchaytirib yubordi va natijada daromad keltirmaydigan oltin kabi aktivlarga talab pasaydi.
Boshqa tomondan, «Bitkoin» (Bitkoin) so‘nggi pasayishlarga qaramay 6,17 foizga o‘sdi.
Blokcheyn tahlilchilari bo‘lgan «CryptoQuant» (on-chain tahlil kompaniyasi) hisobotiga ko‘ra, «Bitkoin» va oltin o‘rtasidagi o‘zaro harakat darajasi -0,88 ga tushib ketgan. Bu so‘nggi bor 2022-yil noyabr oyida kuzatilgan eng past ko‘rsatkich. Bu esa, ikki aktiv hozir butunlay qarama-qarshi yo‘nalishda harakat qilayotganini bildiradi.
