«OpenAI» sunʼiy intellekt kompaniyasi «Sora» nomli Sunʼiy intellekt yordamida video yaratish dasturini bekor qilmoqda. «Sora» jamoasi yaqin orada batafsil ma’lumot, jumladan, ilova va API xizmatining yopilish vaqti hamda foydalanuvchilar o‘z videolarini qanday saqlab qolishi bo‘yicha ko‘rsatmalar e’lon qilinishini maʼlum qildi.
So‘nggi yangiliklardan tez xabardor bo‘lish uchun bizni «X» ijtimoiy tarmog‘ida kuzatib boring
«OpenAI» kompaniyasi «Sora» dasturini birinchi bor 2024-yil fevral oyida tanishtirgan edi. Ushbu mustaqil ilova 2025-yil sentyabr oyida ommaga taqdim etildi. Biroq, endi bu ilova ishga tushganidan atigi olti oy o‘tib to‘xtatiladi.
«The Wall Street Journal» axborot agentligiga ko‘ra, «OpenAI» kompaniyasi rahbari Sem Altman xodimlarga Sunʼiy intellekt asosidagi barcha video mahsulotlar bosqichma-bosqich to‘xtatilishini aytgan. Endi «Sora» jamoasi uzoq muddatli loyiha, jumladan, robototexnika yo‘nalishiga o‘tmoqda.
Bu qaror «The Walt Disney Company» (film kompaniyasi) kompaniyasi «OpenAI» bilan muhim shartnoma imzolaganidan keyin qabul qilindi. Uch yilga mo‘ljallangan litsenziya kelishuvida «Sora» dasturi «Marvel», «Pixar» va «Star Wars» multimediya brendlarining 200 dan ortiq personajlari yordamida ko‘rsatmalarga asoslangan videolar yaratishi kutilgandi. «The Hollywood Reporter» (ommaviy axborot vositasi) xabariga ko‘ra, endi «Disney» (film kompaniyasi) ham 1 milliard dollarlik kelishuvdan voz kechmoqda.
Akash Gupta, muallif va podkastlar boshlovchisi, «Anthropic» (sunʼiy intellekt kompaniyasi) kompaniyasi 2026-yil boshiga kelib, faqat chat, kod va kompyuterda ishlashga yo‘naltirilgan strategiya natijasida yillik 19 milliard dollar daromadga erishganini aytdi. Ular video, tasvir yaratish yoki oddiy foydalanuvchilar uchun ijtimoiy ilovalar yo‘nalishiga chiqmagan bo‘lsa-da, aynan shu yo‘l muvaffaqiyatli bo‘ldi. «OpenAI» kompaniyasi bunday yondashuvga e’tibor qaratyapti.
«OpenAI» bozordagi yutuqlar qayerdan kelayotganini tahlil qilib, asosiy daromad dasturlash va korporativ xizmatlar orqali kelayotganini anglab yetdi. Shuning uchun ular aynan shu modelni takrorlamoqda. «ChatGPT», «Codex», va brauzer funksiyalari endi yagona ilovada birlashtirilmoqda», — dedi Akash Gupta.
Ushbu strategiya moliyaviy jihatdan o‘zini oqlaydi. «Sora» dasturining iOS va Android tizimlaridagi jami foydalanuvchi daromadi sentyabr oyidan beri atigi 1,4 million dollarni tashkil etdi. Har gal video generatsiya qilinayotganida, asosiy mahsulotlar uchun kerak bo‘lgan GPU — ya’ni grafik protsessorlar quvvati kamayib ketmoqda.
«OpenAI» kompaniyasining «Sora» uchun mas’ul rahbari chiplar yetarli emasligi sababli video generatsiyaga chegaralar qo‘yilishini e’lon qilgan edi. 2026-yil uchun kutilayotgan 14 milliard dollarlik yo‘qotishni hisobga olsak, har bir GPU juda muhim», — deya qo‘shimcha qildi Akash Gupta.
Shu tariqa, «Sora» ilovasining yopilishi «OpenAI» kompaniyasining endi korporativ mijozlar, dasturlash va chatga yo‘naltirilgan, asosiy daromad keltirayotgan model tomon to‘liq o‘tganini ko‘rsatadi. Aynan ushbu model kompaniyaning asosiy raqibida muvaffaqiyat keltirmoqda.
