«Optimism» (blokcheyn ekotizim loyihasi) jamoasining 20 foizidan ortig’i qisqartirilayotganini tashkilot ichkarisidagi manbalar ma’lum qilmoqda.
Bir nechta manbalar «BeInCrypto» (axborot nashri) muxbiriga aytishicha, qisqartirishlar seshanba kuni jamoa ichida muhokama qilina boshlangan va bir nechta guruhlarning protokol ishlab chiqish va ekotizimdagi tashabbuslariga taʼsir qilgan. Qaysi xodimlarga bu holat taʼsir qilgani haqida aniq maʼlumot hozircha rasmiy e’lon qilinmagan.
Ba’zi xodimlar bu qisqartirishlarni ijtimoiy tarmoqlarda tasdiqlashni boshlashdi.
Ayirbosh bozorida OP tokeni katta zarba oldi
Xodimlarni qisqartirish ushbu loyiha tokeni bo‘lgan OP uchun og‘ir pallaga to‘g‘ri keldi. OP tokenining narxi so‘nggi oylar davomida keskin pasaydi. Hozirda u taxminan $0.12 atrofida savdolanmoqda, yil boshidan beri 55 foizdan ko‘proqqa tushdi. Bu haqda bozordagi ma’lumotlar ko‘rsatmoqda.
«Optimism» — eng yirik «Efirium» (blokcheyn platformasi) Layer-2 tarmoqlaridan biri hisoblanadi. Uning asosiy maqsadi — «Efirium» ekotizimini masshtablash, ya’ni tarmoq imkoniyatlarini kengaytirish uchun «optimistik rollap» deb ataluvchi texnologiyadan foydalanishdir. Optimistik rollap — bu tranzaksiyalar (bitimlar)ni arzon va tez amalga oshirish imkonini beradigan tizim.
Loyiha, shuningdek, OP Stack deb nomlangan infratuzilma tashabbusiga ham rahbarlik qiladi. Bu tashabbus orqali paydo bo‘layotgan «Superchain» ekotizimida bir qancha tarmoqlar, jumladan, «Base» tarmog‘i ham ishlamoqda.
Hozircha qisqartirishlar «Superchain» yo‘nalishi bo‘yicha ichki strategik o‘zgarishlar, bozor sharoiti yoki kengroq qayta tuzilmalar bilan bog‘liqligi aniqlik kiritilmagan.
Hozircha «Optimism» qisqartirishlar yuzasidan rasmiy bayonot bermagan.
Bu voqea hamon rivojlanmoqda. Yangi ma’lumotlar paydo bo‘lsa yoki «Optimism» tomonidan rasmiy izoh berilsa, ushbu xabar yangilanadi.
