«Solana» blokcheyn platformasida ishga tushirilgan «White Whale» (WHITEWHALE) memkoini bir vaqtlar bozordagi umumiy qiymati 181 million dollardan oshgan edi, biroq hozirda 55 foizdan ko‘proq qadrsizlandi.
Ushbu pasayish, uning hamjamiyatini boshqarishda yetakchi bo‘lgan va asl ismini yashirgan treyder «X» ijtimoiy tarmog‘idan chiqib ketishini e’lon qilganidan so‘ng yuz berdi.
So‘nggi yangiliklar uchun bizni X ijtimoiy tarmog‘ida kuzatib boring
Token narxi qariyb 0,012 dollargacha tushdi va bozor qiymati 15 million dollardan pastga tushib ketdi. «CoinGecko» (kripto sohadagi statistikani taqdim qiluvchi platforma) ma’lumotlariga ko‘ra, ushbu yangiliklardan so‘ng, sarmoyadorlar faol harakat qilgani sababli, kunlik savdo hajmi 1000 foizdan ortiq oshdi.
Shuni ta’kidlash kerakki, «White Whale» — taniqli treyder bo‘lsa-da, memkoinni o‘zi ochmagan. Mazkur token ilk bor 2025-yil oktabr oyida paydo bo’lgan.
U 2025-yil dekabr oyida loyiha rivojiga qo‘shildi. O‘shanda tokenlarni sotib oldi, likvidlik (pul aylanishi)ni ta’minladi va jamiyat boshqaruvini o‘z qo‘liga oldi. Bunga sabab esa, uning nomi bilan soxta loyihalar chiqarilib, obro‘siga putur yetkazilishi xavfi edi.
«Ismim bilan atalgan token uchun, oxirgi javobgarlik menimda deb bilaman. DAO va boshqa tuzilmalar koʻpincha bu sohada goʻyo hamma ishtirok etadigan demokratiya bor degan tasavvurni beradi. Aslida esa bu deyarli yo‘q. Siz ‘HyperLiquid’ni yaxshi boshqaradi deb Jefga ishonyapsiz. ‘White Whale’ esa o‘z nomi uchun mas’ul boshqaruvchi boʻladi deb ishoniladi», — dedi «White Whale» joriy oyda «BeInCrypto» (kripto yangiliklari nashri)ga.
O‘sha paytda ham u «chekinishni o‘ylash ham imkonsiz», deya ta’kidlagan edi.
Biroq, ketishini bildirgan postida u bolalari bilan bog‘liq oilaviy inqiroz, ruhiy sog‘lig‘ining yomonlashuvi hamda jamiyat bosimi sababini keltirdi. Bundan tashqari, «kripto»ga bo‘lgan ishtiyoqi ham susaygani haqida yozgan.
Shuningdek, «White Whale» 500 million dona WHITEWHALE tokenini yakka tranzaksiya orqali abadiy bloklab qo‘yganini maʼlum qildi. Ushbu harakat natijasida, tokenlarning jami 1 milliardta doimiy miqdorining yarmi muomaladan chiqib ketdi.
«Qiymati 13 million dollar bo‘lgan ta’minotni abadiy bloklab qo‘yish — men sizlarga bera oladigan eng katta xayrlashuv sovg‘am», — deb yozdi u.
U, shuningdek, loyiha uchun uzluksizlik rejasi ishlab chiqilganini aytdi. Ijtimoiy tarmoqdagi faoliyatni hamkori Vinchenso Mayettga topshiradi.
«DEX (markazlashmagan birja) likvidlik havzasi faoliyati ham eng tajribali hamkorlardan biri tomonidan davom ettiriladi. Men esa ortda turib nazoratda bo‘laman», — deyiladi postda.
Treyder «X» ijtimoiy tarmog‘idan ketishi na nafrat, na o‘ziga achinish sabab ekanini urg‘uladi.
«Pump.fun bu soha uchun zararli illat. Siz ham, men ham buni bilamiz, shunga qaramay uni ishlatishda davom etyapsiz. Men esa, bu soha mendan ko‘proq narsani olib qo‘ymasidan avval chekinish yo‘lini tanlayapman. Hayotda allaqachon tushunganman: agar o‘zingiz yaxshi bo‘lmasangiz, boshqalarga ham foyda bera olmaysiz. Hozir men yaxshi emasman. Buni ochiq tan olish ham normal holat», — dedi u.
Endi «WHITEWHALE» tokeni egalari uchun asosiy savol: hamjamiyat ushbu o‘zgarishga moslasha oladimi yoki yo‘qmi, degan masala.
