«Polymarket» bashorat bozori platformasi hisoblaridan «The Times of Israel» nashrining harbiy muxbiri Emanuil Fabian’ga taxdid qilgan deb gumon qilingan foydalanuvchilarni chetlashtirdi.
Yaqinda e’lon qilingan xabarida platforma Emanuil Fabian yoki boshqa har qanday shaxsga nisbatan haqorat va tahdidlarni keskin qoralashini bildirdi.
Ushbu qaror Fabian’ga nisbatan bosim o‘tkazilgandan so‘ng amalga oshirildi. U 10-mart kuni Eron tomonidan uchirilgan ballistik raketa Isroildagi Beit Shemesh tashqarisidagi ochiq maydonga tushgani, biroq hech kimga zarar yetkazmaganini xabar qilgan edi. Bu xabar yirik mablag‘ yo‘qotish xavfi ostida qolgan garovchilar tomonidan tashkil etilgan bosim kampaniyasining markaziga aylandi.
«Men yozgan kichik xabar – raketa ochiq maydonga tushgani haqidagi ma’lumot – endi garov urushining markazida turibdi. 10-mart kuni Eron Isroilga zarba bermaydi deb pul tikkanlar menga maqolamni o‘zgartirishimni talab qilishmoqda, toki ular ko‘p mablag‘ yutib olishsin», deb yozdi u o‘z maqolasida.
Boshida maqolani to‘g‘rilash so‘ralgan oddiy elektron xatlar yuborilgan bo‘lsa, keyin bu harakat muvofiqlashtirilgan bosim kampaniyasiga aylandi. Ba’zi shaxslar hatto boshqa axborot vositalaridagi hamkasblariga ham murojaat qilishdi.
Bitta shaxs esa ijtimoiy tarmoqlarda soxta skrinshot tarqatdi. Unda go‘yo Fabian xatoni tan olgani va to‘g‘rilash kiritishga rozilik bildirgani aks ettirilgan edi.
Vaziyat yanada keskinlashdi. O‘zini «Haim» deb tanishtirgan bir kishi tunda WhatsApp orqali tahdidli xabarlar yuborishni boshladi. U Fabian’ga ushbu guruh 900 000 AQSH dollari miqdorida mablag‘ini boy berishi mumkinligini va undan kam bo‘lmagan miqdorda mablag‘ evaziga unga zarar yetkazish niyati borligini aytgan.
Tahdidli xabarlarda Fabian yashaydigan mahalla, ota-onasi va aka-uka ham eslatib o‘tilgan. Bundan tashqari, soatga bog‘langan ultimatum ham yuborilgan.
«86 daqiqa qoldi. Hayotingiz uchun faqat o‘zingiz javobgarsiz», deb yozgan «Haim» Fabian e’lon qilgan ma’lumotlarga ko‘ra.
Fabian yozishicha, u politsiyaga murojaat qilgan va hozirda huquq-tartibot organlari hodisani o‘rganmoqda.
