Uchtalik «Samsung» (Koreya Respublikasi texnologik kompaniyasi) sho’ba korxonalari birgalikda, Koreyaning eng yirik kriptovalyuta birjasi «Upbit»ni boshqaruvchi «Dunamu» (IT kompaniyasi)dan jami to’rt foiz ulushni sotib olishga rozi bo‘lishdi. Bu bitim umumiy hisobda 408 million AQSH dollariga baholandi va may oyida koreys moliya gigantlari tomonidan amalga oshirilgan faollikni yakunladi.
Ushbu bitim tafsilotlarini, moliyaviy tashkilotlarning keng qamrovli xarid harakatlarini va bu holat Koreyaning tez o‘zgarib borayotgan raqamli aktivlar bozori uchun nimani anglatishini sodda qilib tushuntirib beramiz.
«Samsung» va «Dunamu» bitimi nimani anglatadi?
2024-yilning 28-may kuni «Samsung Securities» (moliyaviy xizmat ko‘rsatuvchi kompaniya), «Samsung SDS» (axborot texnologiyalari kompaniyasi) va «Samsung Card» (moliyaviy tashkilot) birgalikda «Kakao Investment» (investitsiya kompaniyasi)dan jami 1,39 million dona «Dunamu» aksiyalarini sotib olishini ma’lum qilishdi. Umumiy xarajat 612,8 milliard vonni, ya’ni tahminan 408 million AQSH dollarini tashkil etdi.
Hisobotlarga ko’ra, uchta sho‘ba kompaniya o‘rtasida aksiyalar aniq taqsimlangan. «Samsung Securities» 2% ulush oladi, «Samsung SDS» va «Samsung Card» esa har biri 1% ulushga ega bo‘ladi.
«Dunamu» nafaqat Koreyada, balki xalqaro miqyosda ham ahamiyatga ega. 2012-yilda tashkil etilgan va Song Chi-xyung (Song Chi-hyung) raisligida faoliyat yuritayotgan kompaniya o‘tgan yili Janubiy Koreyaning kriptovalyutani joyida (spot) sotib olish savdolari hajmining qariyb uchdan ikki qismini boshqargan.
Shu darajada keng ko‘lamli bozor ulushi «Upbit»ni dunyodagi eng faol birjalardan biri qatoriga qo‘yadi. Shuning uchun, «Dunamu» mulkchilik tuzilmasidagi har qanday o‘zgarish butun mintaqada faol bo‘lgan xalqaro bozor ishtirokchilari, token chiqaruvchi kompaniyalar va saqlovchi tashkilotlarga ham bevosita ta’sir qiladi.
Kompaniya bayonotiga ko‘ra, «Dunamu» «Samsung» sho‘ba korxonalari bilan blokcheyn asosidagi moliyaviy investitsiya mahsulotlari, to‘lov infratuzilmasi va blokcheyn texnologiyasidan foydalangan holda «AI» (Sunʼiy intellekt) yo‘nalishiga kengayish ustida hamkorlik qiladi.
So’nggi yangiliklar uchun bizni X ijtimoiy tarmog’ida kuzatib boring
Nima uchun Koreyaning yirik moliyaviy tashkilotlari «Dunamu» sari shoshilmoqda?
Janubiy Koreyaning kripto bozori ilgari asosan jismoniy investorlar hisobiga ishlagan. Banklar, brokerlik kompaniyalari va yirik industriyalar ko‘p yillar davomida tartibga solishdagi noaniqlik va raqamli aktivlar tizimining aniq ko‘rsatmalari yo‘qligi sababli faol harakat qilmas edi.
Hozirda bu holat tezkor o‘zgarib bormoqda. 15-may kuni «Hana Financial Group» (moliyaviy tashkilot) bank bo‘linmasi 2,28 million dona «Dunamu» aksiyasini 1,003 trillion von, ya’ni taxminan 669 million AQSH dollariga sotib olishga kelishdi va 6,55% ulushga ega bo‘ldi.
Bu qaror «Hana»ni Koreyada kripto birjada to‘g‘ridan-to‘g‘ri ulush olgan birinchi moliyaviy xolding kompaniyasiga aylantirdi. Oradan besh kun o‘tib, «Hanwha Investment Securities» (moliyaviy xizmatlar ko‘rsatuvchi kompaniya) o‘z ulushini 9,84% ga oshirib, 597,8 milliard von (taxminan 399 million AQSH dollari) sarfladi.
Ushbu uchta yirik bitim ikki haftadan kam vaqt ichida «Dunamu» ulushining deyarli 14 foizini Koreyaning etakchi kompaniyalariga o‘tkazib berdi. Umumiy xarajat esa butun ushbu jarayonda 2,2 trillion vondan oshdi.
Xaridorlarning har biri von kursiga bog‘langan steyblkoinlar, tokenlashtirilgan qimmatli qog‘ozlar va blokcheyn orqali to‘lovlarni amalga oshirish imkoniyatini oldindan egallashni asos sifatida keltirgan. Masalan, «Hana» von qiymatiga bog‘langan steyblkoinlarni va blokcheyn asosida pul o‘tkazmalarini rejalashtirmoqda va buning uchun «Dunamu»ning «GIWA Chain» (Efirium tarmog‘i bazasida ishlovchi ikkinchi darajali tarmoq) texnologiyasidan foydalangan holda rivojlantirishni mo‘ljallamoqda.
Ayni paytda, «Kakao Investment» (investitsiya kompaniyasi) o‘z ulushidan chiqmoqda, chunki «Dunamu»ning narxi 15 trillion von deb baholangan «Naver Financial» (moliyaviy xizmat ko‘rsatuvchi kompaniya) bilan to‘liq aksiyaviy birlashuvga tayyorgarlik ko‘rilmoqda. Bu o‘zgarish natijasida «Kakao» ulushi o‘tgan yil oxirida 10,58% bo‘lgan bo‘lsa, hozirda atigi 0,13% ga tushib qoldi.
Bu esa, ilgari birlashishga to‘siq bo‘lishi mumkin deb hisoblangan aksiyadorni yo‘qotadi. Ikkala kompaniya ham aksiyadorlarning ovozini 18-avgustga, bitimning yopilish sanasini esa 30-sentabrga ko‘chirishdi. Sababi, Adolatli raqobat komissiyasi (yirik nazorat organi) ko‘rib chiqish muddatini uzaytirganini bildirdi.
