S&P 500 indeksi olti oy ichida 18,3% ga o‘sdi, «Goldman Sachs» investitsiya banki sunʼiy intellekt (AI) texnologiyasiga oid kompaniyalarni hisobga olmaydigan indeks esa 6,7% ga ko‘tarildi. Mikrosxemalar ishlab chiqaruvchilar yetakchiligida AI bo‘yicha o‘sish asosiy indeksni rekord darajaga olib chiqqan bo‘lsa, AIdan tashqari indeks hali ham o‘zining eng yuqori ko‘rsatkichidan 6,4% pastda turibdi.
S&P 500 hamda Nasdaq Composite indekslari seshanba kuni yangi rekord darajada yopildi. Boshqa tomondan, «Goldman Sachs» investitsiya bankining AIdan tashqari indeksida esa eng yuqori ko‘rsatkich avgust oyida kuzatilgan.
S&P 500 va uning sunʼiy intellektsiz varianti qachon farq qila boshladi?
Google Finance ma’lumotlariga ko‘ra, S&P 500 indeksi olti oy ichida 18,3% ga o‘sib, seshanba kuni 7 818,93 ga yetdi. AIdan tashqari indeks — SPXXAI esa 6,7% o‘sib, 3 123,24 ga chiqdi. Bu ikki indeks o‘rtasidagi farq — 11,6 foiz bandni tashkil etadi.
Bu indeksni «Goldman Sachs» investitsiya banki 2024-yil fevral oyida mijozlariga sunʼiy intellektga bog‘liq sarmoyalarni sug‘urtalash imkonini berish uchun yaratganini «Axios» axborot portali xabar qildi. Unda bank AI texnologiyalariga aloqasi bor deb topgan kompaniya aksiyalari chiqarib tashlangan. Bunday kompaniyalar indeks tarkibining taxminan 45% ini tashkil qilgan.
Sunʼiy intellektdan tashqari indeks 52 haftada 3 337,19 bilan eng yuqori natijaga erishgan, bugun esa bu ko‘rsatkichdan 6,4% pastda. Shu paytda S&P 500 esa tarixiy eng yuqori nuqtasidan atigi 0,3% orqada bormoqda.
So‘nggi yuksalishni mikrosxema ishlab chiqaruvchi kompaniyalar ta’minlagan. «AMD», «Marvell», «Synopsys» va «Cadence Design Systems» kompaniyalarining har biri taxminan 20 kunlik savdo davomida kamida 20% ga o‘sdi, deya xabar beradi «CNBC» televizion axborot tarmog‘i.
Biroq, «Schwab» moliyaviy kompaniyasining mutaxassisi Kevin Gordon avgust boshidan buyon o‘rtacha aksiyalar narxi eng yuqori darajadan eng pastiga qadar 14% ga pasayganini qayd etdi. Bu haqda «BeInCrypto» axborot portali ham xabar berdi.
AI savdosining yangi bosqichida elektr energiyasi ishlab chiqaruvchi kompaniyalar yetakchilik qilishi mumkinmi?
«VanEck» aktivlarni boshqarish kompaniyasi bosh direktori Yan van Ek fikriga ko‘ra, AI savdosining birinchi bosqichi chip kompaniyalari bilan bog‘liq bo‘ldi. U elektr energiyasi ishlab chiqaruvchilar va atom elektr stansiyalari bu jarayonning ikkinchi bosqichi, ya’ni AI 2.0 bosqichi bo‘lishini aytmoqda.
Unga ko‘ra, bu soha joriy yilda maʼlumotlarni saqlash markazlarining haddan tashqari ko‘payishi bilan bog‘liq siyosiy xavotirlar sababli ortda qoldi. Biroq «Constellation Energy» elektr kompaniyasi seshanba kuni «Alphabet» kompaniyasi bilan elektr energiyasi bo‘yicha shartnoma imzolangach, 12,3% ga oshdi, deya yozadi «Nikkei Asia» iqtisodiyot axborot portali.
Yan van Ekga ko‘ra, bu bitim bu soha uchun eng past nuqtani bildirishi mumkin. Ammo, u qayd etgan bir taxmin bozorida bu yil yangi atom elektr stansiyasining tasdiqlanishi ehtimoli 10% dan kam deb ko‘rsatilgan.
«Menimcha, bu sodir bo‘lganida, AI 2.0 savdosidagi ushbu qurg‘oqchilik tugaydi».
Yan van Ek, «VanEck» aktivlarni boshqaruvchi kompaniyasi bosh direktori, «CNBC» axborot telekanali orqali
Bu farq shuni ko‘rsatadiki, asosiy indeksning rekord natijalari hozirda sunʼiy intellektga aloqador kompaniyalar aksiyalari hisobiga saqlanyapti. Yilning uchinchi choragida eng ko‘p bulutli xizmatlarga sarf qiluvchi kompaniyalarning moliyaviy hisobotlari — ushbu tayanch saqlanib qoladimi yoki yo‘qmi, shuni aniqlab beradi. Bozor barqarorligi, investitsiyalar barqarorligi, kelajak barqarorligi ana shunga bog‘liq.
