«Cyvers» blokcheyn xavfsizligi platformasi «Truebit Protocol» blokcheyn protokoli ishtirokidagi shubhali on-chain (zanjir ichidagi) tranzaksiyani aniqladi, bunda taxminan 26 million AQSh dollari atrofida mablag‘ yo‘qotilgani qayd etildi.
«Cyvers» tashkiloti real vaqt monitoring tizimlari orqali g‘ayrioddiy bir tranzaksiyani aniqladi. Bunda yagona manzilga taxminan 8 535 Efirium (ETH) yuborilgan. On-chain’da ushbu operatsiyaga «Truebit Protocol: Purchase» («Truebit Protocol»: xarid) deb yorliq qo‘yilgan edi.
Hozirgi bozor narxlariga ko‘ra, bu tranzaksiya qiymati taxminan 26 million AQSh dollariga teng bo‘ldi.
2026-yilda yuz bergan ilk yirik xakerlik hodisasi haqida nimalarni bilamiz?
«Cyvers» kompaniyasi monitoring tizimlari bu faoliyatni odatdagidan tashqari xatti-harakatlar va xavf darajasining oshishi sababli signal orqali bildirdi.
Kompaniya ushbu pul o‘tkazmalarini protokolga xos odatiy tranzaksiyalar yo‘nalishiga mos kelmasligini ta’kidladi.
Chop etilish vaqtida «Truebit Protocol» tashkiloti tomonidan xavfsizlikka oid har qanday hodisa yoki mablag‘ yo‘qotilgani haqida ommaga ma’lum qilinmagan va tranzaksiyaning mohiyati hamda maqsadi borasida rasmiy sharh berilmagan.
Hozircha mablag‘lar kimlar tomonidan va nima sababdan ko‘chirilgani – bu ekspluatatsiya, ichki amaliyot yoki noto‘g‘ri sozlangan aqlli shartnoma (smart kontrakt) bo‘lishi aniq emas.
«Truebit Protocol» blokcheyn protokoli bo‘lib, murakkab hisob-kitoblarni to‘g‘ridan-to‘g‘ri zanjirda bajarish o‘rniga, ularni tekshirish va tasdiqlashga ixtisoslashgan.
Katta hisoblash ishlarini Efirium blokcheynida bajarish o‘rniga, «Truebit Protocol» ularni blokcheyn tashqarisida (off-chain) amalga oshirishga imkon beradi. So‘ngra ularning to‘g‘riligini kriptografik va iqtisodiy samarali usullar bilan tekshiradi.
Ushbu protokol katta hajmdagi ma’lumotlarni qayta ishlash yoki murakkab mantiqiy jarayonlarni blokcheynda ishga tushirish qimmat yoki qiyin bo‘lsa, aqlli shartnomalarga yordam berish uchun yaratilgan.
Ayni paytda, «Cyvers» tashkiloti ushbu manzil va unga bog‘liq tranzaksiyalarni kuzatishda davom etmoqda.
Kompaniya ushbu faoliyatni tasdiqlangan ekspluatatsiyaga to‘g‘ridan-to‘g‘ri bog‘lamagan, biroq tranzaksiya ichki me’yorlarga ko‘ra g‘alati deb topilganini alohida ta’kidladi.
Bu voqea hali rivojlanishda davom etmoqda.
