AQSH Senatori Elizabet Uorren «Office of the Comptroller of the Currency» (OCC) – davlat moliya nazorati organidan «World Liberty Financial» (WLFI) kompaniyasining milliy ishonch banki litsenziyasi bo‘yicha arizasini ko‘rib chiqishni Prezident kompaniyadan to‘liq chiqib ketmaguncha kechiktirishni so‘radi.
Uorren OCC rahbari Jonatan Gould nomiga yo‘llagan maktubda ilgari hech uchramagan manfaatlar to‘qnashuvi haqida ta’kidladi. Unga ko‘ra, bunday vaziyat Tramp oilasining mazkur loyihadagi ishtiroki sababli yuzaga kelmoqda.
Uorren AQSH Valyuta nazorati boshqarmasidan WLFI banki uchun litsenziyani kechiktirishni so‘ramoqda
«BeInCrypto» axborot nashrining yozishicha, WLFI o‘z arizasini o‘tgan hafta sho‘ba korxonasi «WLTC Holdings LLC» orqali taqdim etgan. U «World Liberty Trust Company, National Association» (WLTC) – yangi ishonch kompaniyasini tashkil etish niyatida.
Tashkil etilayotgan bu tashkilot barqaror tokenlar – stablecoinlar bilan ishlashga ixtisoslashadi. Ya’ni, ular USD1 nomli tokenlarni chiqarish va qabul qilish, shuningdek, saqlash hamda almashtirish operatsiyalarini amalga oshiradi.
Uorren o‘z maktubida Prezident va uning oilasi biznesdagi ishtiroki jiddiy xavotirlarga sabab bo‘lishini bildirdi. 2025-yilda qabul qilingan «GENIUS Act» qonuni asosida, OCC tashkiloti hukumat tomonidan litsenziya olgan barqaror token chiqaruvchilarning asosiy nazoratchisi bo‘lgan.
Bu vakolat OCC organiga ruxsatnomalarni tasdiqlash, faoliyatni nazorat qilish hamda qonunlarga rioya qilinishini ta’minlash majburiyatini yuklaydi. Agar WLFIga ruxsat berilsa, regulyator mamlakat rahbarining shaxsiy foydalariga aloqador tashkilot ustidan bevosita va doimiy nazorat huquqiga ega bo‘ladi. Senator, shuningdek, Tramp oilasi «World Liberty Financial» va boshqa kriptovalyuta sohasidagi loyihalardan “ehtimol”, bir milliard dollardan ortiq daromad olganini ham qayd etdi.
«Agar ariza ma’qullansa, siz Prezident kompaniyasining foydasiga ta’sir qiluvchi qoidalarni belgilaysiz. Bundan tashqari, siz to‘g‘ridan-to‘g‘ri Prezident kompaniyasi va uning raqobatchilariga nisbatan qonunchilikka rioya etilishini nazorat qilish va qonunni ijro etish uchun javobgar bo‘lasiz. Siz bu vazifalarni, o‘z navbatida, Prezident tomonidan lavozimga tayinlangan holda olib borasiz. Natijada, ilk bor tarixda Oq uy rahbari, ya’ni Prezident o‘zining moliyaviy kompaniyasiga bevosita rahbarlik qiladi», — deyiladi maktubda.
Shuningdek, WLFI rasmiy sayti kompaniya asoschilaridan «Barron Tramp», «Erik Tramp» va «Donald Tramp Jr.» — Prezident Trampning o‘g‘illari ekanini ko‘rsatmoqda. Prezident «Bosh asoschi Emeritus» (sharafli hamasoschi) sifatida ham tilga olinadi.
«Bosh asoschi Emeritus» – bu tashkilot asoschilardan biri bo‘lib, endi rahbar yoki boshqaruv funksiyasiga ega emas. U faqat faxriy, maslahat yoki ramziy maqomda faoliyat yuritadi.
Senator Uorren ilgari ham bu borada xavotirlarini OCCga bildirgani va bank regulyatori «Donald Tramp»ning «katta moliyaviy manfaatlar toʻqnashuvi» bank tizimi siyosatiga ta’sir ko‘rsatmasligi uchun qanday choralar ko‘rayotgani haqida savol bilan murojaat qilgani qayd etildi.
O‘sha vaqtda OCC bu masala nazariy bo‘lib, unga javob berishdan bosh tortgan edi. Ammo endilikda WLFI arizasi rasman topshirilgani sababli, Uorrenga ko‘ra, bu xavotirlar endi to‘g‘ridan-to‘g‘ri va real tus olgan.
«Sizning befarq javobingiz va Prezident manfaatlariga xizmat qiluvchi xavfli tashabbuslarni muhrlashga tayyor ekanligingiz sizga arizani qonuniy mezonlar asosida xolis baholashda ishonch uyg‘otmaydi», — deya ta’kidladi Uorren.
Senator OCCdan talab qilib, «Donald Tramp» «World Liberty Financial» kompaniyasidan va o‘z oilasi manfaatlaridan to‘liq voz kechmaguncha arizani ko‘rib chiqishni yozma tarzda kechiktirishga kafolat berishni so‘radi. U javob berish uchun 20-yanvar sanasini muayyan muddat sifatida belgiladi.
«Biz hech qachon bunday darajadagi moliyaviy manfaatlar to‘qnashuvi yoki korruptsiyani ko‘rmagan edik. «GENIUS Act» qabul qilinganida Amerika Qo‘shma Shtatlari Kongressi bu muammoni yechishda ojizlik qilgan — shuning uchun, Senat ushbu Krisptovalyuta bozor tuzilmasiga oid qonunlarni ko‘rib chiqayotganda, mazkur aniq va real manfaatlar to‘qnashuviga baho berishi shart. Shu orada, Prezidentga daxldor bu korruptsiyaga nisbatan jamoatchilikning haqli e’tirozlarini yumshatish uchun, mazkur arizani ko‘rib chiqishni Tramp ham o‘zi, ham oilasi va kompaniyasining barcha moliyaviy manfaatlaridan voz kechmaguncha kechiktirishingiz kerak», — deb yozgan edi Uorren.
Senator Uorrenning bu aralashuvi AQSH bank sohasida milliy ishonch banki litsenziyalarini kriptovalyuta kompaniyalariga berishga oid kengroq xavotirlarni ham aks ettiradi. «The Independent Community Bankers of America» (ICBA) — mustaqil banklar uyushmasi va «The American Bankers Association» (ABA) — amerikalik banklar uyushmasi ham xuddi shunday arizalar yuzasidan norozilik bildirgan. Bu ro‘yxatga «Ripple» kompaniyasi, «Circle» korporatsiyasi, «Fidelity» investitsion firmasi, «Paxos», «First National Digital Currency Bank» va «BitGo» kompaniyalari kiradi.
Bu orada, Uorrenning WLFI bo‘yicha tutgan pozitsiyasi «Donald Tramp»ga aloqador boshqa kriptovalyuta loyihalariga ilgari ham tanqidiy yondashganini ko‘rsatadi. 2025-yil boshida, Uorren va Kongress vakili Jeyk Auchincloss regulyatorlarni, jumladan «SEC» — Qimmatli qog‘ozlar va birjalar komissiyasi, shuningdek «CFTC» — Tovar fyuchers shartnomalari savdosi komissiyasini Prezident va birinchi xonim tomonidan chiqarilgan «TRUMP» va «MELANIA» memkoinlarini tekshirishga undagan edi.
