Aksariyat raqamli aktivlarni boshqaruvchi xazinalar (Digital Asset Treasuries, DATs) sohasida amalga oshmagan zararlar tobora ko‘paymoqda, chunki umumiy kriptovalyuta bozori kapitallashuvi pasayishda davom etmoqda. «Evernorth» kompaniyasi ham, bozorning uzoq muddatli istiqboliga ishongan va o‘zining xazinasida XRP tokenini asrab kelayotgan kompaniyalar kabi, xuddi shu ahvolni boshidan kechirmoqda.
Shu qiyinchiliklarga qaramay, chakana investorlar tomonidan kelayotgan ijobiy signallar va «Ripple» ekotizimidagi bir nechta ijobiy o‘zgarishlar XRP kursining tiklanishiga umid bermoqda.
Evernorth 380 million dollar miqdoridagi amalga oshmagan zarar bilan yuzma-yuz bo‘ldi
Dunyoning eng yirik XRP egalaridan biri sanaladigan «Evernorth Holdings» kompaniyasi ham XRP narxlarining tushib borishi natijasida jiddiy moliyaviy bosimni boshdan kechirmoqda.
«CoinGecko» (analitik platforma) ma’lumotlariga ko‘ra, hozirda «Evernorth» kompaniyasida 473 276 430 dona XRP mavjud boʻlib, bu aylanmadagi umumiy taklifning taxminan 0,473 foizini tashkil qiladi. Mazkur tokenlarning bugungi kunda bahosi 684,7 million AQSh dollariga teng deb baholanmoqda.
Kompaniya o‘tgan yilning oktabr va noyabr oylarida XRP sotib olish bo‘yicha ikki yirik haridni amalga oshirdi. Shundan so‘ng, ushbu aktiv zaxiralarini oshirmagan.
«CryptoQuant» (analitik platforma) ma’lumotlariga ko‘ra, «Evernorth» kompaniyasining amalga oshmagan yo‘qotishlari so‘nggi bir necha oyda barqaror ortib bormoqda. Bugungi kunda, XRP narxi 1,50 dollardan past savdolashayotgani sababli, yo‘qotishlar 380 million dollardan oshib ketgan.
«BeInCrypto» (axborot sayti) boshqa DAT xazinalarida ham shunga o‘xshash holatlarni yoritgan. «BitMine» kompaniyasi 4,28 milliondan ortiq Efirium (ETH) tokenini ushlab turib, qariyb 7 milliard dollar amalga oshmagan zarar ko‘rmoqda. Yana bir kompaniya — «Strategy» ham «Bitkoin» narxi 71 000 dollardan past tushganida 4 milliard dollardan ortiq yo‘qotish bilan yuzma-yuz kelmoqda.
XRP va umuman altkoinlar narxining pasayishi bu kabi kompaniyalar uchun moliyaviy bosimni kuchaytirib bormoqda. Yangi investitsiyalar jalb qilish, aksiyalar yoki qarz chiqarish orqali sarmoya topish tobora qiyinlashmoqda. Investitsiya qilishga tayyor odamlar moliyaviy yo‘qotishlari katta bo‘lgan firmalarga mablag‘ tikishga shoshilmaydi.
Eng yomon holatda, qarzlarni to‘lash yoki xizmat faoliyati uchun shoshilinch naqd pul zarur bo‘lgan kompaniyalar o‘z aktivlarini sotishga va moddiy yo‘qotishlarga duch kelishga majbur bo‘lishlari mumkin. Bunday harakatlar altkoinlar narxining yanada tushishiga olib kelishi ehtimoldan xoli emas.
«Capriole Investment» (investitsiya kompaniyasi) asoschisi Charlz Edvards, DAT modeli haqida «portlashi muqarrar bo‘lgan xavfli yondashuv» sifatida baho berdi. U DAT sektorining tez kengayishini 1920-yillardagi investitsion trestlarning gullab-yashnashiga o‘xshatdi. Uning ta’kidlashicha, bugungi kriptovalyuta bozoridagi oqibatlar «Luna» va «FTX» (birja) inqirozidan ham jiddiyroq boʻlishi mumkin.
Ijobiy yangiliklar XRPʼning sotuv bosimini yengillashtirishga yordam bermoqda
«Santiment» (maʼlumot tahlilchisi) maʼlumotlariga ko‘ra, oddiy investorlar hozirgi narxlarda XRP tokeni haqida ijobiy fikrda qolmoqda. Bu holat «Bitkoin» va «Efirium» uchun kuzatilayotgan salbiy kayfiyat bilan tubdan farq qiladi.
Bu ijobiy kayfiyatga XRP bilan bog‘liq xushxabarlardagi to‘lqin sabab bo‘lmoqda. Masalan, «Ripple» (kompaniya) tomonidan muhim institutlar uchun mo‘ljallangan «Ripple Prime» platformasiga «Hyperliquid» (platforma) integratsiyasi ijobiy yangilik sifatida namoyon bo‘ldi. Shuningdek, yana bir muhim o‘zgarish – ko‘pchilik validatorlar (tasdiqlovchi tugunlar)ning 91 foizidan ko‘proq ovoz olgan holda, 2026-yil 4-fevralda «XRPL Permissioned Domains» (ruxsatli domenlar) ishga tushirilishi bo‘ldi.
Shu orada, «CryptoQuant» platformasidan tahlilchi CryptoOnchain, «Binance» (birja) platformasida XRP bo‘yicha ochiq pozitsiyalar miqdori 2024 yil noyabrdan beri eng past darajaga tushib, 405,9 million dollarga yetganini ta’kidladi.
Bu pasayish katta «leverage» (qarzga asoslangan savdo) tozalangani, yani bozordagi xavfli koeffitsiyent kamaygani haqida signal beradi. Ochiq pozitsiyalar past bo‘lsa, XRP narxlari uzun yoki qisqa pozitsiyalarning ommaviy yopilishi natijasidagi o‘zgaruvchanlikka unchalik sezgir bo‘lmay qoladi. Bunday muhit bozorning yangilanishi va sog‘lom tiklanishiga yordam beradi.
«Derivativ sohasidagi bunday «toza sahifa» sog‘lom va barqaror trend uchun muhim shart bo‘lib xizmat qiladi. Ortiqcha leverage bartaraf etilgach, majburiy savdolar tufayli yuzaga kelgan bosim kamayadi. Agar blokcheyn (bloklar zanjiri) ichidagi faol darajadagi ko‘rsatkichlar ortgan bo‘lsa, talab kuchayganda, narx ortiqcha risk omillarisiz tabiiy tiklanishi mumkin», – deydi CryptoOnchain o‘z fikrida.
Biroq, qisqa muddatli tiklanish «Evernorth» (investitsiya kompaniyasi)ning hali ham shakllanmagan zararlari uchun yetarli bo‘lmasligi mumkin. Ularning o‘rtacha xarid narxi taxminan 2,40 dollar atrofida, hozirda esa XRP narxi 1,43 dollarni tashkil qilmoqda. Bunday darajada daromad olish uchun XRP narxi taxminan 70 foiz o‘sishi talab etiladi. Bu esa bozorga katta miqdorda yangi investitsiyalar kirib kelishi va umumiy moliyaviy muhitda sezilarli tiklanish bo‘lishini talab qiladi.
