XRP 2026-yil boshida turli signallar bermoqda. Janubiy Koreyaning «Upbit» kriptovalyuta birjasi va «Bithumb» kriptovalyuta birjasidagi zaxiralar keskin qisqardi. Bu hodisa 2024-yil oxirida XRP 560% ga o’sishidan avvalgi vaziyatni eslatmoqda. Shu bilan birga, XRP Ledger blokcheynida katta tranzaksiyalar soni so‘nggi uch oyda rekord darajaga – 2 802 taga yetdi. Ammo 7-yanvar kuni AQSHda XRP asosidagi spot ETF fondlari noyabrda ishga tushirilganidan beri ilk bor sof pul chiqimini qayd etdi — bir kunda 40,8 million dollar chiqib ketdi.
Janubiy Koreya birjalaridagi faoliyat va institutsional talabning pasayishi XRP narxi bo‘yicha keyingi bosqich haqida aniq xulosa chiqarishni qiyinlashtiradi.
Koreya birjalaridan ko‘chirilayotgan kriptovalyutalar avvalgi ko‘tarilish davrini eslatmoqda
2026-yilning birinchi haftasida yirik Janubiy Koreya birjalarida XRP zaxiralari ancha kamaydi. Qoʻlda o‘tkazilgan tahlilga ko‘ra, 1 milliondan ortiq XRP tutgan hamyonlar zaxirasida 22 millionta token — umumiy taklifning 0,14 foizi — 2025-yil 31-dekabrdan beri qisqargan. «Upbit» birjasi taxminan 40 million XRP yo‘qotgan, «Bithumb» esa 20 million atrofida, bu orada «Binance» kriptovalyuta birjasi o‘z zaxirasini 25 dan 30 milliongacha oshirgan.
Ushbu naqsh tarixda muhim rol o‘ynagan. 2024-yil noyabrida XRP «Upbit»dan chiqishni boshlaganda, uning narxi bir necha oy ichida $0,50 dan $3 gacha oshdi. Janubiy Koreya birjalari hanuzgacha XRP savdosining eng yirik markazlaridan hisoblanadi. Shu sababli, zaxiralardagi harakatlar butun dunyodagi narx shakllanishiga ta’sir qilishi mumkin.
Birjadan chiqishlar sarmoyadorlarning tokenlarni qisqa muddatda sotish uchun emas, uzoq muddatli shaxsiy saqlashga o‘tkazayotganidan dalolat berishi mumkin. Yirik birjalarning tadqiqotlari shuni ko‘rsatadiki, katta miqdordagi chiqishlar ko‘pincha uzoq muddatli egalar tomonidan yig‘ilishni aks ettiradi. Bu esa platformalardagi taklifning kamayishiga, qisqa muddatli sotuv bosimining pasayishiga olib keladi.
Yanvar oyining boshlarida blokcheynda yirik harakatlar kuchaydi. XRP Ledger blokcheynida 5-yanvar kuni 2 170 ta katta tranzaksiya — har biri 100 000 dollardan ortiq qiymatdagi o‘tkazma — amalga oshirilgan. Keyingi kuni bu ko‘rsatkich 2 802 taga yetib, so‘nggi uch oy ichidagi maksimal darajaga yetdi.
Bir kun ichida 29 foizlik o‘sish yirik egalar faol harakat qilayotganidan dalolat beradi. Odatda bu — bozorda o‘zgaruvchanlik kuchayishidan oldin kuzatiladigan belgidir.
XRP birja fondlari ishga tushirilganidan beri ilk bor mablag’ chiqishini qayd etdi
AQSHda spot XRP ETF fondlari 7-yanvar kuni birinchi marta sof chiqimni qayd etdi — 40,8 million dollar chiqib ketdi. Bu fondlar 2025-yil noyabr o‘rtalarida ishga tushirilgandan beri ilk bor kuzatilmoqda. Bu chiqimda eng katta ulush «21Shares XRP ETF» (TOXR) fondiga to‘g‘ri keldi — 47,25 million dollar. «Grayscale» (moliyaviy kompaniya) tomonidan boshqariladigan GXRP esa yagona kirim qayd etgan fond bo‘lib, unga 1,69 million dollar kiritildi.
Bu chiqimdan oldin bir necha hafta davomida institutsional sarmoyalar barqaror ravishda kirib kelgan edi. Hozirgi kungacha umumiy sof kirimlar 1,2 milliard dollarni tashkil etadi, boshqaruv ostidagi jami aktivlar esa 1,53 milliard dollarni tashkil qilmoqda. Ammo bu burilish institutsional investorlar ishtahasi so‘nayotganini ko‘rsatmasmikan? Ayniqsa, ayni vaqtda Koreya chakana sarmoyadorlari tokenlarni birjalardan olib chiqayotgani kuzatilayotgan bir paytda.
Hamma pul chiqishlari ham bozor o‘sishiga olib kelmaydi
«CryptoQuant» tahlil platformasining «Binance» birjasi uchun ma’lumotlariga ko‘ra, 2024-yil o‘rtalarida ham zaxiralar xuddi shunday past darajaga tushgan. Biroq, token narxi bir necha oy mobaynida $0,50 atrofida barqaror bo‘lib turgan. 2024-yil noyabrida boshlangan o‘sish esa zaxiralar avvalgi darajadan oshgachgina yuzaga kelgan, ya’ni taklif eng qisqargan paytda emas.
Baʼzi tahlilchilar kishilarning ko‘pincha iqtibos keltiradigan birja maʼlumotlari umumiy mavjud taklifni to‘liq ochiqlamasligini ham ta’kidlashadi. 30 ta platformani qamrab oluvchi kengroq monitoringga ko‘ra, birjalarda taxminan 14 milliard XRP saqlanyapti, bu esa faqat kamroq platformani kuzatadigan manbalarga qaraganda ancha yuqori ko‘rsatkichdir.
Prognoz
2026-yilning yanvar oyi boshlarida XRP narxi $2,30 atrofida savdolashdi. Bu, 2025-yilning iyul oyidagi o‘zining maksimal cho‘qqisi — $3,65 dan ancha past. 2024-yil noyabridan 2025-yil yanvarigacha token narxi $0,50 dan $3 dan oshib ketdi. Shundan so‘ng, 2025-yil davomida asosan barqarorlik bosqichiga o‘tgan.
Hozirgi vaziyat esa ziddiyatli signallarni taqdim etmoqda. Koreya birjalaridan chiqimlar va yirik investorlarning faolligi 2024-yil oxiridagi o‘sishdan oldingi vaziyatni eslatadi. Lekin birinchi marta ETF fondlaridan chiqim va tarixiy tajriba shuni ko‘rsatadiki, bunday indikatorlar narx o‘sishini kafolatlamaydi. Yanvar oyi davomida Koreya chakana investorlari faoliyati institutsional kirimlar pasayishini qoplay oladimi yoki yo‘qmi — eng asosiy savol shu boʻlib qolmoqda.
