Bir xaker «Binance» kompaniyasining hammuassisi Yi He’ning «WeChat» ijtimoiy tarmog‘idagi akkauntini egallab olib, Mubarakah nomli token bilan pump va dump sxemasini amalga oshirdi, natijada tahminan 55 000 dollar atrofida foyda ko‘rdi.
Ushbu buzilish, buzib kirilgan ijtimoiy tarmoqlardagi akkauntlar orqali kriptovalyuta bozorlarini manipulyatsiya qilish borasidagi xavotirlarni kuchaytirmoqda. Xavfsizlik bo‘yicha mutaxassislar tezda xakerning tranzaksiyalarini kuzatib chiqib, firibgarlik sxemasi tafsilotlarini aniqladilar.
Binance rahbarining ijtimoiy platformasiga uyushtirilgan hujum
Xaker Yi He’ning «WeChat» ijtimoiy tarmog‘i akkauntiga kirib, Mubarakah tokeni haqida reklama mazmundagi xabarlar joylashtirdi. Yi He «Binance» kompaniyasining hammuassisi bo‘lib, u hajmi bo‘yicha dunyodagi eng yirik kriptovalyuta birjasi hisoblanadi.
Changpeng Jao bu buzilishni tasdiqladi va barcha foydalanuvchilarni ehtiyot bo‘lishga chaqirdi. U an’anaviy ijtimoiy platformalarda kuchli xavfsizlik mavjud emasligini ta’kidladi.
«Kimdir @heyibinance’ning WeChat ijtimoiy tarmog‘idagi akkauntini buzdi. Xakerlar joylashtirgan postlardan memkoin sotib olmang. Web 2 ijtimoiy tarmoqlari xavfsizligi kuchsiz. O‘zingizni ehtiyot qiling!» — deya u yozdi.
Blokcheyn tahlil kompaniyasi «Lookonchain» xakerning harakatlarini aniqladi. Hujumchi yangi ikkita hamyon yaratib, taxminan etti soat oldin 19 479 USDT ni sarflab, arzon narxda 21,16 million Mubarakah token sotib olgan.
Yi He’ning buzib olingan akkauntidan soxta post chiqarilgach, Mubarakah tokenining narxi jadal oshdi. «Geckoterminal» ma’lumotlariga ko‘ra, bugun Osiyoning ertalabki savdosida token narxi $0,008 ga yetib, deyarli 200 foizga o‘sdi va token uchun yangi tarixiy maksimumni qayd etdi.
Xaker 11,95 million tokenni 43 520 USDT evaziga sotdi, qolgan 9,21 million tokenning qiymati taxminan $31 000 ni tashkil qilmoqda. Xaker foydalangan hamyon manzillari: 0x6739b732C14515997Caa8deCb6C047dc1c02Fb9c va 0xD0B8Ea6AF32A4F44Ed7F8A5E4E7b959239f5AE1D.
«Ijtimoiy tarmoqlarda tasdiqlanmagan tokenlarni reklama qiluvchi xabarlar va qolib ketishdan qo‘rqish sindromiga (FOMO) duch kelganda ehtiyotkor bo‘ling, shunda bu kabi firibgarlik qurboni bo‘lmaysiz», — deb «PeckShieldAlert» (kiberxavfsizlik tashkiloti) ogohlantirdi.
