«Tether» kompaniyasi, «TRON» blokcheyn platformasi va «TRM Labs» kripto-analitika tashkilotining birgalikdagi tashabbusi boʻlgan T3 Moliyaviy Jinoyatlar Bo’limi 2024-yil sentabridan beri noqonuniy kriptovalyuta aktivlaridan 450 million AQSH dollaridan ortiq mablag’ni muzlatdi. 2025-yilda oʻtgan yilga nisbatan noqonuniy mablagʻlarni ushlab qolish koʻrsatkichi 43,9% ga oshdi.
May oyi hisobotiga koʻra, «Tether», «TRON» va «TRM Labs» tashkilotlarining hamkorligi AQSH, Ispaniya, Germaniya, Niderlandiya va Bolgariya huquqni muhofaza qiluvchi idoralari bilan ham rivojladi. «Financial Action Task Force (FATF)» xalqaro moliyaviy monitoring tashkiloti ushbu boʻlimni raqamli aktivlarga oid jinoyatchilikka qarshi kurashishda davlat va xususiy sektor hamkorligining ilgʻor namunasiga aylanganini ta’kidladi.
T3 23 ta yurisdiksiya bo‘ylab faoliyat doirasini kengaytirmoqda
Bo‘lim AQSH, Ispaniya, Germaniya, Braziliya va Birlashgan Qirollik (Buyuk Britaniya) ham jumladan, jami 23 ta davlatda faoliyat yuritadi. Bo‘lim 2024-yil sentabrda ish boshlaganidan buyon besh qit’adagi millionlab tranzaksiyalarni tahlil qilib, birjalardagi xakerliklar, ekspluatatsiya holatlari, Koreya Xalq Demokratik Respublikasi (KXDR) bilan bog‘langan faoliyatlar, terrorchilik uchun moliyalashtirish, pul yuvish va zo‘ravon jinoyatlar bilan bog’liq holatlarni aniqladi.
T3 avvalgi faoliyatida Ispaniyadagi pul yuvish tarmog‘i aniqlanib, Madrid shahrida joylashgan jinoyatchilar guruhidan taxminan 26,4 million dollar qaytarib olinganini ham ko‘rsata oladi.
Javob berish tezligi ham ustuvor yo‘nalishlardan biri. T3 bo‘limi hisoblarni egallab olish va favqulodda zo‘ravon jinoyatlar yuzaga kelganda mablag‘larni 24 soat ichida muzlatgan.
Ushbu bo‘lim «Lusocoin» amaliyotida ham yordam ko‘rsatdi — bu Braziliya Federal Politsiyasi tomonidan o‘tkazilgan tergov boʻlib, jinoyatchilar tarmogʻi bilan bogʻliq kripto aktivlar, jumladan 3 milliard braziliya reali va 4,3 million USDT (bu «Tether» kompaniyasining asosiy barqaror tokeni) muzlatib qo‘yildi.
Zo‘ravon bosqinchilik va Shimoliy Koreya mablag‘lari e’tiborda
Joriy yilda ko‘rilgan holatlar orasida nazorat ostidagi moddalarning noqonuniy aylanishi, terrorchilikni moliyalashtirish va T3 atamasiga ko‘ra «zo‘ravon bosqinchilik» — ya’ni, kriptovalyuta egalariga nisbatan xonadon bosib kirish, o‘g‘irlash va zo‘rlik bilan pul undirish holatlari ham bor.
Bo‘lim vakillari qonuniy so‘rovdan so‘ng, aniqlangan manzillarni bir necha soat ichida muzlatib qo‘yish imkoniga ega ekanini aytmoqda. «BeInCrypto» yangiliklar portali alohida ta’kidlaganidek, raqamli aktiv egalariga nisbatan jismoniy hujumlar soni 2026-yilda keskin ko‘payishi mumkin.
Yil boshida tan olingan muvaffaqiyatlardan biri — «FATF» moliyaviy monitoring tashkiloti tomonidan T3 va «TRM Labs» kripto-analitikasi tashkilotining Beacon Network tarmog‘i raqamli aktiv jinoyatchiligiga qarshi ilg‘or model sifatida nomlanganidir.
«TRM Labs» tashkiloti hisob-kitobiga ko‘ra, noqonuniy kripto-harakatlar hajmi tarixiy rekord — 158 milliard dollarga yetgan. Shuning uchun, real vaqt rejimida aniqlash va muzlatish bugun eng muhim choraga aylandi.
«Ushbu 450 million dollarlik natija – T3 imkoniyatlarining faqat boshlanishi, uning ta’siri va ahamiyati kelajakda yanada oshib boradi», — deya ta’kidladi «Tether» kompaniyasi bosh direktori Paolo Ardoino o‘zining bayonotida.
