«Polkadot» (DOT) kriptovalyutasining «Efirium» tarmog‘iga ko‘chirilgan tokeni ekspluatatsiyaga uchragani haqida xabar qilindi. Maʼlumotlarga ko‘ra, bir xaker bir milliard ko‘chirilgan DOT tokenini soxtalashtirib yaratgan.
Onchain monitoring sohasida faoliyat yurituvchi «Lookonchain» tahlil hisoboti ma’lumotiga ko‘ra, ushbu xaker keyinchalik barcha soxta tokenlarni birgina tranzaksiya orqali sotib, 108,2 ETH (taxminan 237 000 AQSH dollari) foyda olgan.
Blokcheyn xavfsizligi sohasida faoliyat yurituvchi «CertiK» tashkiloti ta’kidlashicha, ekspluatatsiya «Hyperbridge» gateway (eshik) shartnomasiga qaratilgan. Xaker soxta xabar yordamida ruxsatsiz boshqaruvga ega bo‘lgan. Ushbu tashkilot ma’lum qilishicha, hujumchi «Polkadot» token shartnomasidagi admin huquqini o‘zgartirib, Efirium blokcheynida bir milliard token chiqarishga erishgan.
«Polkadot» tashkiloti Hyperbridge tizimining Efiriumdagi gateway shartnomasida muammo aniqlanganini tasdiqladi va ekspluatatsiya faqat ushbu qismlarga cheklanganini ma’lum qildi.
Rasmiy bayonotda jamoa ushbu holat faqat «Hyperbridge» orqali Efiriumga ko‘chirilgan DOT tokenlariga taalluqli ekani, «Polkadot» ekotizimidagi boshqa aktivlar va boshqa koʻprik yechimlari orqali oʻtkazilgan DOT tokenlariga ta’sir qilmasligini alohida e’tirof etdi.
«Polkadot» markaziy tarmog‘i, uning parachain (qoʻshimcha zanjir)lari va asl DOT tokenlari xavfsizligi ta’minlangan va zarar ko‘rmagan. «Hyperbridge» ishi tekshiruv yakuniga qadar to‘xtatildi», — deyiladi rasmiy xabarda.
Bu hodisa kriptovalyuta xavfsizligi borasida yangi tushunmovchilik va xavotirlarni keltirib chiqarmoqda. Voqea rivojlanmoqda, yangi tafsilotlar aniq bo‘lishi bilan yangiliklar to‘ldirib boriladi.
