Kriptovalyuta bozori 2023 yil sentabr oyidan beri davom etayotgan uzoq inqirozni boshdan kechirayotgan bir paytda, «Bitcoin Cash» (kriptovalyuta) kutilmaganda yorqin nuqtaga aylandi. 2026 yilning fevral oyida «Bitcoin Cash» bir qator muhim rekordlarni yangiladi va bu uni yuqori noaniqlik sharoitida ham kuchli tarmoq sifatida ko‘rsatdi.
Nega sarmoyadorlar «Bitcoin Cash»ni ushlashda davom etmoqda? Bu tendentsiya uning narxiga qanday ta’sir ko‘rsatishi mumkin?
BCH tarmog‘idagi o‘rtacha tranzaksiya qiymati keskin oshdi
Eng esda qolarli natija fevral oyida qayd etildi: «Bitcoin Cash» tarmog‘ida har bir o‘rtacha tranzaksiya qiymati 2 million AQSh dollaridan oshdi. Bu ko‘rsatkich 2017 yilda ushbu tarmoq «Bitkoin»dan ajralib chiqqanidan beri tarixiy maksimumga yetdi.
Taqqoslash uchun, o‘tgan yili «Bitcoin Cash» tarmog‘ida o‘rtacha tranzaksiya qiymati atigi 20 ming dollar atrofida edi. Hozirgi natija bu qiymatdan salkam 100 barobar yuqori.
Tarixiy maʼlumotlarga ko‘ra, o‘rtacha tranzaksiya qiymatining yuqorilashi odatda katta narx o‘sishini kutishga zamin yaratadi. Bunday holatlar 2018 va 2021 yillarda ham kuzatilgan. Yangi rekord ham bozorda yirik investorlar qaytayotganidan dalolat beradi.
Yana bir muhim indikator — «Bitcoin Cash»ning bozorda nisbatan barqaror qolayotgani. «Bitcoin Cash Dominance» (BCH.D) — bu indikator «Bitcoin Cash»ning kapitalizatsiyasi umumiy kriptovalyutalar bozoridagi ulushini ko‘rsatadi.
«TradingView» (moliyaviy tahlil platformasi) maʼlumotlariga ko‘ra, o‘tgan yil sentabridan buyon umumiy kriptobo‘zoridan qariyb 2 trillion dollar chiqib ketgan. Lekin shunday vaziyatda ham, BCH.D 0,25 foizdan 0,48 foizgacha o‘sdi. Bu 2024 yil apreldan beri eng yuqori ko‘rsatkichdir.
BCH.D o‘sishi butun bozor kapitali kamayayotgan davrda ham ko‘plab investorlar o‘z «Bitcoin Cash» tokenlarini saqlab turganini ko‘rsatadi. Shunday omillar tufayli aktiv narxi ketma-ket bir necha oy davomida taxminan 560 dollar atrofida barqaror saqlanib qoldi.
Layla yangilanishi ijobiy kayfiyat uyg‘otmoqda
Nega sarmoyadorlar BCH tokenini yig‘moqda va ushlab turmoqda? Bu savolga javob bo‘lishi mumkin bo‘lgan bir sabab – yaqinda bo‘lib o‘tadigan Layla yangilanishi kutilyapti. Ushbu yangilanish 2026 yil may oyida ishga tushirilishi rejalashtirilgan.
Layla yangilanishi «Bitcoin Cash» tarmog‘i uchun fork (tarmoqlanish)dan keyingi eng yirik islohotlardan biri sanaladi. «Bitcoin Cash» dasturchisi Jeyson Dreyzenherning (Jason Dreyzehner) taʼkidlashicha, ushbu yangilanish tokenlardan foydalanish imkoniyatlarini oshiradi, kvant kompyuterlari tahdidiga qarshilikni kuchaytiradi hamda maxfiylik jihatlarini mustahkamlaydi.
Bu eʼlon «Bitcoin Cash» atrofida muhokamalarni kuchaytirdi va sarmoyadorlar eʼtiborini oshirdi.
«CT BCHni targ‘ib qilishni boshladi. Triggerlar oddiy, lekin haqiqatan ham bu ZEC, XMR va boshqa maxfiy tokenlar bilan bo‘lgani kabi samarali bo‘ladimi?» — deydi investor Hexdrunker o‘zining X ijtimoiy tarmog‘idagi sahifasida.
«BeInCrypto» (axborot nashri) yaqinda eʼlon qilgan tahlilga ko‘ra, Layla yangilanishi bilan bog‘liq ijobiy hissiyotlar yaqin orada «Bitcoin Cash» narxini 650 dollarga yetkazishi mumkin.
