«Twitter» ijtimoiy tarmog’i hamasoschisi Jyek Dorsi boshchiligidagi «Block» (texnologik kompaniya) oʻz xodimlarining deyarli yarmidan koʻprogʻini qisqartirishini e’lon qildi. Bu jarayonda 4 000 dan ortiq ishchi ishdan bo’shatiladi va kompaniya 10 000 dan oshiq xodimdan 6 000 tagacha qisqaradi.
Xabarlarga ko‘ra, kompaniyada odamlarni ishdan bo‘shatishga asosiy sabab «Sunʼiy intellekt» vositalarining rivojlanishi bilan baʼzi lavozimlar endi keraksiz bo‘lib qolishi hamdir.
AI (sunʼiy intellekt) asosida qisqartirishlar davom etmoqda
Jyek Dorsi xodimlarga yuborgan xatida bu jarayonni «kompaniya tarixidagi eng og‘ir qarorlardan biri» deb atadi. U bu qisqartishlar moliyaviy qiyinchilik sabab emasligini, kompaniya yalpi foydasi va rentabelligi oshib borayotganini qayd etdi.
Uning so‘zlariga ko‘ra, qisqartirishlarning asosiy sababi – «Sunʼiy intellekt» vositalarining tez rivojlanishi va kichik hamda soddaroq jamoalarga o‘tish istagi bo‘lgan.
Ishdan bo’shatilayotgan xodimlarga 20 hafta ish haqi to‘lanadi va har bir ishlagan yil uchun yana bir haftalik ish haqi belgilanadi.
Shuningdek, ular may oyining oxirigacha yillik aksiyalaridan foydalanish huquqiga ega bo‘lishadi, olti oyga tibbiy sugʻurta saqlanib qoladi, korporativ qurilmalar hamda 5 000 dollar miqdorida oʻtish davri uchun yordam puli beriladi. Boshqa davlatlarda esa mahalliy qonunlarga muvofiq shartlar boʻladi.
Jyek Dorsi bosqichma-bosqich qisqartirish o‘rniga, bu ishni birdaniga amalga oshirishni afzal koʻrganini aytdi. U takroriy qisqartirishlar jamoaning ruhiy kayfiyati va ishonchiga putur yetkazishini ta’kidladi.
«Block» (ilgari «Square», texnologik kompaniya) savdo to‘lov tizimlari va «Cash App» deb nomlangan p2p xizmatni boshqaradi.
«Cash App» foydalanuvchilarga «Bitkoin» sotib olish va sotish imkonini beradi. Kompaniya oʻz balansida ham «Bitkoin» tutadi va «Bitkoin» infratuzilmasiga sarmoya kiritadi. Bunga o‘z tokenlarini o‘zi saqlash dasturlari hamda mayning loyihalari kiradi.
Jyek Dorsi «Block» kompaniyasini «Bitkoin» rivojiga yaqinlashtirish maqsadida ish olib bormoqda.
2022-yil oktyabrda Ilon Mask «Twitter» ijtimoiy tarmog‘ini to‘liq sotib oldi va keyin uni «X» ijtimoiy tarmog‘i deb qayta nomladi. O‘sha paytda Jyek Dorsi bu o‘zgarishni ochiq qo‘llab-quvvatladi.
Ushbu qayta tashkil etish «Block» kompaniyasi uchun muhim burilish bo‘ldi. Endilikda Dorsi kompaniyani kichik jamoalar va markazda «Sunʼiy intellekt»dan foydalanish asosida boshqarishga ahamiyat bermoqda.
