XRP Ledger blokcheynida fevral oyida bir nechta muhim indikatorlar (ko‘rsatkichlar) qayd etildi. Ushbu raqamlar «Ripple» kompaniyasi (kripto kompaniyasi) blokcheyn texnologiyasini keng ommaga tarqatishda, unga e’tibor va jadal rivojlanishni jalb qilish borasidagi samaradorligini ko‘rsatib turibdi.
Biroq, fevral oyining so‘nggi haftasida XRP narxi $1,4 dan past darajada ushlab turildi. Ko‘plab ijobiy signal va bashorat qilingan o‘sishga qaramay, narx ko‘tarilmadi.
XRP kitobidagi faollik fevral oyida yangilanishlardan so‘ng oshdi
XRPscan ma’lumotlariga ko‘ra, oxirgi oyda XRP Ledgerda muvaffaqiyatli amalga oshirilgan to‘lovlar soni muntazam oshib bordi. Dekabr oyining oxirida bu ko‘rsatkich 1 million tranzaksiyani tashkil qilgan bo‘lsa, fevral oyida 2,7 milliondan oshdi. Bu o‘tgan 12 oy ichidagi eng yuqori natija hisoblanadi.
XRP Ledger tizimida «muvaffaqiyatli to‘lov» — bu blokcheyn tarmog‘i ishtirokchilari (validatorlar) tomonidan tasdiqlangan va umumiy blokcheyn kitobiga yozilgan tranzaksiya (o‘tkazma)dir.
Shu bois, tranzaksiyalar sonining ko‘payishi XRP Ledger faoliyatining yanada jonlanayotganini anglatadi. Odamlar bu tarmoqdan haqiqiy to‘lovlar, pul o‘tkazmalari, DeFi ilovalari yoki boshqa maqsadlarda faol foydalanayotganini ko‘rsatadi.
«XRP tarmog‘idagi faoliyat barqaror. Kuniga 2 million atrofida tranzaksiyalar va 40 mingdan ortiq faol manzillar. Bu — haqiqiy foydalanuvchi aktivligi. Ko‘plab blokcheynlar faqat yangi hikoyalar va yangiliklarga o‘ch bo‘lsa, XRPL esa doimiy qiymat uzatishda davom etmoqda. To‘lovlar. Hisob-kitoblar. Mana shunday barqarorlik moliyaviy tashkilotlar uchun juda muhim», — deydi kripto investori «CryptoSensei» («X» ijtimoiy tarmog‘i sahifasida).
Bundan tashqari, XRPL blokcheynidagi Markazlashmagan DEX birjasida mavjud bo‘lgan Avtomatik Bozor Yaratuvchi (AMM) muhim faollik ko‘rsatdi. 14 mingdan ortiq depozitlar amalga oshirildi. Bu o‘zgarish XRPL blokcheyniga qo‘shimcha markazlashmagan likvidlik (aktiv almashtirish quvvati) olib kirdi va savdo paytida narxlar tafovutini kamaytirdi.
Qayd etish kerakki, AMM faoliyati ilgari hech qachon bunday yuqori darajada bo‘lmagan. Bu yirik faollik fevral boshida «Permissioned Domains» yangilanishi joriy etilgach kuzatildi. Oradan ikki hafta o‘tib, tarmoqda «Permissioned DEX» ham ishga tushirildi.
Investorlar «Permissioned DEX» kelajakda banklar, to‘lov kompaniyalari va moliya tashkilotlari uchun XRP Ledger blokcheynida boshqariladigan, nazorat qilinadigan muhitda savdo qilishni osonlashtiradi deb umid qilmoqda.
Barcha ushbu ijobiy signallarga qaramay, XRP narxi beshinchi oy qatorasiga pasayishda davom etdi va fevral oyining oxirgi haftasi ham pasayish bilan yakunlandi. Maqola yozilgan paytda, XRP narxi $1,33 ni tashkil etmoqda. Bu yil boshidagi eng yuqori narxidan 45% ga past.
«BeInCrypto» nashri (kripto yangiliklari sayti) so‘nggi hisobotida aytilishicha, mayda va katta hajmdagi investorlar tomonidan birjalarga ko‘p miqdorda XRP tokenlari olib kelinayotgani sotuv bosimini oshirmoqda. Amalga oshgan zararlar 2022 yildan beri eng yuqori darajaga yetdi.
Biroq, tarixiy signal va tajriba shuni ko‘rsatadiki, bunday kuchli salbiylik ko‘plab hollarda narx «tub» darajaga yetgach, kuchli o‘sish boshlanishidan oldin yuzaga chiqadi. «BeInCrypto» so‘nggi tahlilida, XRP narxining tiklanishiga ishonch paydo bo‘lishi uchun, avvalo $1,47 dan yuqoriga ko‘tarilishi va bu darajadagi qarshilikni yengib o‘tishi lozimligini tushuntirdi.
