«JPG Store» – “Kardano” (ADA) blokcheynining yetakchi NFT bozori, 2026-yil 23-may kuni o‘z faoliyatini hamda unga qarashli «Comet» platformasini butunlay yakunlashini e’lon qildi.
Jamoa bunday yopilish sababi sifatida ish faoliyatining barqaror emasligini ko‘rsatdi. «JPG Store» 2021-yildan buyon «Kardano» ekotizimida xizmat qilib, minglab foydalanuvchilar uchun NFT savdosini amalga oshirib kelgan edi.
JPG Store foydalanuvchilari bilishi zarur bo‘lgan ma’lumotlar
Yopilish ikki bosqichda amalga oshiriladi. Birinchi bosqichda cheklov rejimi 23-apreldan ishga tushirildi va yangi e’lonlar, takliflar, kreditlar, shuningdek, NFT yaratish imkoniyati o‘chirildi. Shu davrda foydalanuvchilar mavjud e’lonlarni xarid qilish, faol buyurtmalarni bekor qilish va kreditlarni qaytarishlari mumkin.
23-maydan boshlab sayt yopilish haqidagi rasmiy sahifaga yo‘naltiriladi. Shu vaqtdan boshlab barcha bozor funksiyalari to‘xtaydi.
Agar foydalanuvchilarning NFT’lari o‘z-o‘zini boshqaradigan hamyonlarda saqlansa, hech qanday harakat qilishga hojat yo‘q. Ularning aktivlari boshqa platformalar orqali, masalan, «JPG Store»ning aqlli shartnomalarini jamlaydigan xizmatlar yoki «Kardano CLI» orqali ochiq bo‘lib qoladi.
Lekin ijtimoiy tarmoq orqali kiriladigan hamyonlardan foydalanuvchilar o‘z aktivlarini 30 kun ichida «Lace», «Eternl» yoki «Flint» kabi an’anaviy Web3 hamyonlariga o‘tkazishlari zarur.
Faol e’lonlar, kutilayotgan takliflar yoki ochiq kreditlarga ega foydalanuvchilar muddat tugashidan oldin ularni bekor qilishlari yoki bitimlarni yakunlashlari lozim.
Yopilishdan so‘ng aqlli shartnomalarda qolib ketgan aktivlar blokcheynda mavjud bo‘lib qoladi. Biroq, ularni qaytarib olish uchun texnik bilim yoki uchinchi tomon vositalari talab etiladi.
Yana bir NFT bozori yopildi
«JPG Store»ning yopilishi so‘nggi oylar davomida faoliyatini to‘xtatayotgan NFT bozorlar ro‘yxatini yanada kengaytirdi. «Gemini» birjasiga oid «Nifty Gateway» bozori ham 2026-yil fevral oyida o‘z faoliyatini to‘xtatgan edi.
Shuningdek, «Immutable» kompaniyasi ham bozorda savdo hajmi kamayib borayotgan bir vaziyatda o‘z marketpleysini yopishga qaror qildi.
Jamoa «Kardano» blokcheynida jamiyat rivojlanishini davom ettirish uchun ochiq manbali shartnoma kodlari va aqlli shartnomalar manzillarini taqdim etdi.
«Bizni doimiy qo‘llab-quvvatlagan insonlarni qadrli bilamiz. Biroq, platformalar endi barqaror faoliyat yurita olmaydigan bosqichga yetib keldi», – deya yozilgan «JPG Store» (NFT bozori) tomonidan «X» ijtimoiy tarmog‘ida joylangan postda.
