«PayPal» (to‘lov kompaniyasi) hozirgina «Meta» (axborot texnologiyalari kompaniyasi) bilan hamkorligini e’lon qildi. Maqsad — «Facebook» ijtimoiy tarmog‘ida bir marta bosib xarid qilish imkonini yaratish. Foydalanuvchilar uzilmasdan, yangiliklar lentasini tark etmagan holda mahsulotni xarid qilishlari mumkin bo‘ladi. Tez orada «Instagram» ijtimoiy tarmog‘i uchun ham ushbu tizim ishlashni boshlaydi. Kriptosohani kuzatadiganlar uchun bu yangi savolni tug‘diradi: PYUSD uchun qanday imkoniyatlar ochiladi?
«PayPal» va «Meta»: Hamkorlik
Yangi integratsiya oddiy, lekin qudratli. Foydalanuvchi «Facebook» ijtimoiy tarmog‘ida yangiliklarni ko‘zdan kechiradi, mahsulotni ko‘radi va bir marta bosib xarid qiladi. Hech qanday boshqa sahifaga o‘tish talab qilinmaydi, ilovani tark etish ham shart emas. Barcha to‘lovlarni «PayPal» amalga oshiradi.
Keyingi qadam – «Instagram» ijtimoiy tarmog‘i. Har ikki platformaning foydalanuvchilari milliardlab kishi ekani inobatga olinsa, bu imkoniyatlarning naqadar kengligi ayon bo‘ladi. Ijtimoiy tarmoqlar orqali savdo tez sur’atlarda o‘smoqda va «PayPal» bu jarayon markazida bo‘lishni xohlamoqda.
«Meta» uchun bu hamkorlik ishonchli to‘lov qatlamini yaratadi. «PayPal» esa jahon boʻyicha eng katta foydalanuvchi bazasiga ega boʻlish imkoniyatini qo‘lga kiritadi.
Qiziqarli fakt: PYUSD’ning bozor qiymati bir yil ichida besh barobardan ko‘proqqa oshib, 4,1 milliard dollarga yetdi. «PayPal» barqaror tokenlarga, ya’ni stablkoinlarga katta umid bog‘layotganini ko‘rish mumkin!
Bu PYUSD uchun nimani anglatadi?
«PayPal» o‘zining PYUSD stablkoinini 2023-yilda ishga tushirdi. 2026-yil mart oyida kompaniya PYUSD’dan foydalanish imkoniyatini dunyo bo‘ylab 70 ta davlatga kengaytirdi. Foydalanuvchilar «PayPal» hisobidan PYUSD’ni sotib olish, saqlash, yuborish va qabul qilish imkoniga ega.
«Meta» bilan tuzilgan hamkorlikda PYUSD bevosita tilga olinmagan. Biroq, kerakli infratuzilma allaqachon yaratilgan. PYUSD an’anaviy to‘lov usullariga qaraganda tezroq va arzonroq hisob-kitobni ta’minlaydi.
Agar «PayPal» PYUSD’ni ijtimoiy tarmoqlardagi savdoga integratsiya qilsa, foydalanuvchilar «Facebook» va «Instagram» ijtimoiy tarmoqlarida stablkoinlar bilan xarid uchun to‘lov qilishlari mumkin bo‘ladi. Hozirda AQShdagi PYUSD egalariga yiliga 4 foiz mukofot taklif etilmoqda. Bu odamlarga odatdagi pul, ya’ni fiat emas, PYUSD’dan foydalanishga rag‘bat beradi.
Bundan tashqari, PYUSD qabul qiluvchi tadbirkorlar tushumlarini bir necha daqiqa ichida olishlari mumkin. «Facebook» va «Instagram» ijtimoiy tarmoqlarida savdo qiluvchi tadbirkorlar uchun mablag‘lar tez tushishi naqd pul aylanishini ancha yaxshilaydi.
Kengroq manzara
Ijtimoiy tarmoqlarda savdo qilish tobora ommalashmoqda. Foydalanuvchilar mahsulotlarni ham aynan shu platformalarda topib, xarid qilishmoqda. «PayPal»ning «Meta» bilan integratsiyasi o‘sib borayotgan bu bozordan ulush olishga imkon ochadi.
Hamkorlik esa zamonaviy to‘lov usullarining keng omma tomonidan qabul qilinayotganini ko‘rsatadi. «PayPal» allaqachon an’anaviy moliya va kriptovalyutani PYUSD orqali bog‘lay olmoqda. «Meta»ning katta auditoriyasi bu jarayonni yanada tezlashtirishi mumkin.
PYUSD «Facebook» va «Instagram» ijtimoiy tarmoqlarida rasmiy to‘lov usuliga aylanishi hozircha noma’lum. Biroq, zamin yaratilmoqda: «PayPal»da stablkoin bor, litsenziyalar bor va eng asosiysi, milliardlab ijtimoiy tarmoq foydalanuvchilariga kirish imkoniyati mavjud.
